کہتے ہیں کہ اگر انسان میں سچی لگن ہو اور وہ مسلسل محنت کرتا رہے تو اسے من چاہی یا اس سے بہتر چیز مل ہی جاتی ہے۔ ایسا ہی کچھ ہوا ایک 30 سالہ لڑکی کولیٹ ڈیویتو (Collette Divitto) کے ساتھ جو کہ پیدائشی طور پر ڈاؤن سنڈروم جیسی بیماری میں مبتلا ہیں۔
کولیٹ نے بتایا کہ "جب میں 26 سال کی تھی تو میں نے جاب کے لیے انٹرویو دینا شروع کئے لیکن مجھے یہ سننا پڑتا تھا کہ آپ ہماری کمپنی کے لیے فٹ نہیں ہیں۔ یہ سن کر مجھے کافی دکھ ہوتا تھا"۔
کولیٹ کا کہنا تھا کہ "میں نے خود کچھ کرنے کا عزم کرلیا تھا، مجھے شروع سے ہی بیکنگ کا شوق تھا، میں نے سوچا کیوں نہ اس شوق کا فائدہ اٹھایا جائے، جس سے دوسروں کو بھی فائدہ پہنچے"۔
انہوں نے بتایا کہ "میں نے اپنی ایک بیکری کھول لی، اس بیکری کے ذریعے میں ان تمام لوگوں کو نوکریاں دینا چاہتی ہوں جو کسی بھی لحاظ سے معذور ہیں اور انھیں کوئی اور نوکری نہیں دیتا"۔
کولیٹ نے کہا کہ "میری بیکری اب خاصی اچھی پوزیشن پر ہے، جبکہ میرے گاہک بھی میرے کام سے بے حد خوش ہیں"۔
کولیٹ کی والدہ روز میری کا کہنا ہے کہ "میں نے اپنی بیٹی کو کبھی یہ محسوس نہیں ہونے دیا کہ وہ دوسروں سے مختلف ہے، میں نے ہمیشہ اسے یہ ہی بتایا کہ ہم سب کو خدا نے بنایا ہے، پھر ہم ایک دوسرے سی مختلف کیسے ہو سکتے ہیں؟"
تاہم کولیٹ کی والدہ کا کہنا تھا کہ "مجھے بہت دکھ ہوتا تھا جب میری بیٹی کو کوئی ریجیکٹ کرتا تھا، لیکن اب میں خوش ہوں کہ اس کی ایک پہچان بن چکی ہے۔"
کولیٹ جیسی باہمّت لڑکی جس کا تعلق بوسٹن سے ہے، ہم سب کے لیے ایک سبق ہیں کہ کس طرح انہوں نے اپنے اندر کی کمی کو خود پر حاوی نہیں ہونے دیا بلکہ اس کو اپنی طاقت بنایا اور لوگوں کو یہ ثابت کیا کہ کوئی بھی انسان کسی دوسرے سے کم نہیں۔