پیغام رسانی کے لئے دنیا بھر میں سب سے زیادہ استعمال ہونے والی ایپلیکیشن واٹس ایپ رواں سال کے اختتام پر کئی اینڈرائیڈ اور آئی او ایس فونز پر نہیں چلے گا۔
تفصیلات کے مطابق سال 2021 کے آغاز سے ہی بہت سے اینڈرائیڈ اور آئی فونز واٹس ایپ استعمال کرنے کے اہل نہیں ہوں گے کیونکہ ان کے آپریٹنگ سسٹم اپلیکشن کے لیے درکار ورژن سے محروم ہوجائیں گے۔
entrepreneur ویب سائٹ کی ایک رپورٹ کے مطابق آئی او ایس 9 سے پہلے کے ورژن پر کام کرنے والے آئی فونز پر واٹس ایپ سپورٹ ختم کردی جائے گی۔ یعنی آئی فون 4 اور اس سے پہلے کے ماڈلز پر واٹس ایپ کو استعمال کرنا ممکن نہیں ہوگا۔
اسی طرح آئی فون 4 ایس، 5، 5 ایس، 5 سی، 6 اور 6 ایس میں واٹس ایپ کو استعمال کرنے کے لیے آپریٹنگ سسٹم کو آئی او ایس 9 یا اس کے بعد کے ورژنز سے اپ ڈیٹ کرنا ہوگا۔
اینڈرائیڈ فونز کی بات کی جائے تو ورژن 4.0.3 سے پہلے کے فونز میں واٹس ایپ کی ایپلیکیشن کام کرنا بند کردے گی۔
اگر آپ کا فون 8 سے 10 سال پرانا ہے تو پھر آپ کو فکر کرنے کی ضرورت ہے کیونکہ آپ کو واٹس ایپ کی بندش کا سامنا کرنا پڑے گا۔