امریکہ سے تعلق رکھنے والے عالمی شہرت یافتہ ریسلر اور ہالی ووڈ اداکار ڈوین جانسن نے اپنے ننھے مداح اور اس کی والدہ کی خواہش بے انتہا خوبصورتی سے پوری کر دی۔
ڈوین جانسن نے سوشل میڈیا ایپلیکیشن انسٹاگرام پر اپنے اکاؤنٹ سے ایک پیغام اور ویڈیو پوسٹ جاری کی جس میں دیکھا جا سکتا ہے کہ اداکار نے کس طرح اپنے مداح کو خوشی سے نہال کیا۔
انہوں نے پوسٹ میں لکھا کہ ''ان کا 13 سالہ مداح جو کہ فلوریڈا میں رہتا ہے، کی ریڑھ کی ہڈی کا حال ہی میں بہت بڑا اور مشکل آپریشن ہوا ہے، اور اس کی والدہ نے ایک خط کے ذریعے مجھ سے بچے کی حوصلہ افزائی کرنے کے لئے کہا تھا''۔
ڈوین نے مزید لکھا کہ ''بچے کی والدہ نے خط میں لکھا تھا کہ ان کا بیٹا مجھے بےحد پسند کرتا ہے اور میں جو کام کرتا ہوں اس سے بہت متاثر ہوتا ہے تو کیا میں اس کی حوصلہ افزائی کے لئے کچھ بھیج سکتا ہوں''۔
انہوں نے ویڈیو پیغام میں مداح کو اپنا دوست قرار دیتے ہوئے کرسمس کی مبارکباد دی اور بیماری سے لڑنے اور تکلیف سہنے پر اس کی تعریف کی اور اسے مضبوط رہنے کی تلقین کی۔