ایسا فلمی مناظر میں اکثر دیکھا چکا ہے کہ کوئی عاشق اپنی محبوبہ سے وعدہ نبھاتا ہے کہ وہ اس کے لئے چاند کا ٹکڑا لا کر دیگا۔ لیکن یہ تو صرف آسمان سے تارے توڑ کر لانے کی باتیں ہیں لیکن اب شوہروں کی جانب سے اپنی بیویوں کو چاند پر زمین بطور تحفہ دی جانے لگی ہے۔
بھارت کے ایک شہر اجمیر کے رہائشی دھرمیندر اجینا نے اپنی بیوی سپنا اجینا کو شادی کی سالگرہ کے موقع پر چاند کی تین ایکڑ زمین تحفے میں پیش کر دی۔
بھارتی میڈیا سے بات چیت کرتے ہوئے دھرمیندر اجینا کا کہنا تھا کہ 24 نومبر کو شادی کی آٹھویں سالگرہ پر بیوی کے لیے کچھ خاص کرنا چاہتا تھا اسی خواہش کی تکمیل کے لیے چاند پر زمین خرید کر بیوی کے نام کر دی۔
دھرمیندر اجینا کا کہنا تھا کہ دنیا میں بطور تحفہ گاڑیاں اور زیورات عموماً دی جاتی ہیں لیکن میں نے اپنی بیوی کے لیے کچھ الگ کرنے کی خواہش میں چاند پر زمین خرید کر اسے تحفے میں دی۔
بھارتی شہری نے امریکی شہر نیویارک میں واقع لونا سوسائٹی انٹرنیشنل فرم کے ذریعے یہ پلاٹ خریدا جس کی خریداری میں انھیں ایک سال کا عرصہ لگا۔
دھرمیندر کا کہنا تھا کہ میں خوش ہوں کیونکہ میں راجھستان میں چاند پر زمین خریدنے والا پہلا شوہر ہوں۔
خیال رہے کہ اس سے قبل راولپنڈی سے تعلق رکھنے والے نوجوان صہیب بھی اپنی اہلیہ کو چاند پر ایک ایکڑ زمین بطور تحفہ پیش کر چکے ہیں۔