واٹس ایپ نے نئے سال کے آغاز پر اپنی خدمات میں تین بڑی تبدیلیوں کا فیصلہ کر لیا، واٹس ایپ ویڈیو کالنگ ایپ زوم اور گوگل میٹ کی ٹکر پر آ سکتا ہے۔
عالمی خبر رساں ادارے کے مطابق انسٹنٹ مسیجنگ کی مقبول ترین ویب سائٹ واٹس ایپ نے 2021 میں کئی اہم تبدیلیاں کرنے کا فیصلہ کیا ہے، 2020 میں یہ تبدیلیاں عالمی وباء کے باعث مؤخر کی گئی تھیں تاہم اب نئے سال میں انہیں متعارف کروایا جائے گا۔
ان تبدیلیوں میں سے اہم ترین تبدیلی یہ ہے کہ واٹس ایپ ویب پر بھی کال اور ویڈیو کال کی سہولت فراہم کی جائے گی، اس حوالے سے غیر ملکی خبر رساں ادارے سے بات کرتے ہوئے واٹس ایپ ترجمان نے یہ واضح کیا تھا کہ آئندہ سال واٹس ایپ یہ سروس متعارف کروا دے گا اور اس سروس کو متعارف کروانے کے بعد واٹس ایپ ویڈیو کالنگ ایپ زوم اور گوگل میٹ کی ٹکر پر آسکتا ہے۔
دوسری اہم تبدیلی یہ متوقع ہے کہ 'بیٹا آئی او ایس' کی اپ ڈیٹ کے بعد واٹس ایپ میں ایک سے زائد ویڈیوز اور تصاویر پیسٹ کی جاسکیں گی، اس کے علاوہ آئندہ سال واٹس ایپ کی راز داری 'پرائیویسی' کی شرائط میں بھی تبدیلی کی جائے گی۔
واٹس ایپ ترجمان کے مطابق پرائیوسی سے متعلق واٹس ایپ کی شرائط میں تبدیلی فروری تک متوقع ہے۔
یاد رہے کہ واٹس ایپ ایک نئی سہولت کی فراہمی کی بھی منصوبہ بندی کر رہا ہے جس میں آئندہ سال واٹس ایپ کے ایک ہی اکاؤنٹ سے متعدد ڈیوائسز کو استعمال کرنے کی سہولت مل سکے گی۔
ٹیکنالوجی امور کے ماہرین کے مطابق کورونا وباء کے بعد فاصلاتی رابطوں، ویڈیو کالنگ اور اس کی بڑھتی ہوئی اہمیت و ضرورت کے باعث ٹیکنالوجی کے شعبے میں آئند برس کئی تیز رفتار تبدیلیاں ہو سکتی ہیں۔