رواں سال ایشیاء میں کئی گنا گرمی ریکارڈ کی جا رہی ہے جس کے باعث پانی کی شدید قلت کا سامنا درپیش ہے۔ موسم گرما میں آئے روز اضافے سے صرف انسان ہی نہیں بلکہ حیوان بھی پریشان ہیں۔
اب شدید گرمی سے پرندے بھی سورج کی تپش برداشت نہیں کر پارہے بلکہ نیچے آکر گرنا شروع ہوگئے ہیں۔ بھارت سے یہ خبر سامنے آئی ہے کہ وہاں ہیٹ ویو کے باعث آسمانوں سے پرندے گرنے لگے ہیں۔
برطانوی خبر رساں ادارے رائٹرز کے مطابق جانوروں کے ڈاکٹروں اور امدادی کارکنوں کا کہنا ہے کہ مغربی بھارتی ریاست گجرات میں روزانہ پانی کی کمی کے باعث گرنے والے درجنوں پرندوں کو اٹھا کر لارہے ہیں۔
ریسکیو حکام کا کہنا ہے کہ ریاست کے سب سے بڑے شہر احمد آباد میں گرمی کی لہر پانی کے ذخائر کو خشک کر رہی ہے جس کی وجہ سے پرندے پیاسے اور پھر آسمان سے گرنے لگتے ہیں۔
ان کے بقول امدادی کارکن روزانہ درجنوں اونچے اڑنے والے پرندوں جیسے کبوتر، عقاب اور طوطے کو آسمان سے زمین پر گرنے کے بعد انہیں ہسپتال لاتے ہیں۔
ٹرسٹ کے زیر انتظام ایک ہسپتال میں جانوروں کے ڈاکٹروں کو بروز بدھ پرندوں کو ملٹی وٹامن کی گولیاں کھلاتے اور سرنج کے ذریعے ان کے منہ میں پانی پلاتے دیکھا گیا۔
ٹرسٹ کے ساتھ مل کام کر کرنے والے اہلکار منوج بھاؤسر کا کہنا ہے کہ یہ سال گرمی کے لحاظ سے بہت برا ہے۔ ہم نےان پرندوں کی تعداد میں 10 فیصد اضافہ دیکھا ہے جنہیں اس گرمی کی وجہ سے بچانے کی ضرورت ہے۔