گھر سے باہر جاتے ہوئے لوگ اچھے سے اچھا لباس زیب تن کرتے ہیں تا کہ ان کی شخصیت پروقار طریقے سے نمایاں ہو لیکن حال ہی میں سوشل میڈیا پر ایک ایسی ویڈیو وائرل ہوئی ہے جس میں ایک شخص لباس کی جگہ کچرے کا تھیلا پہن کر گھوم رہا ہے۔ وہ ایسا کیوں کررہا ہے؟ آئیے جانتے ہیں
کچرے کے تھیلے پہننے والے اس شخص کا نام روب گرینفیلڈ ہے البتہ لوگ انھیں "ٹریش مین" کہتے ہیں۔ بظاہر عجیب و غریب نظر آنے والے روب دراصل ماحول کو بہتر بنانے والے سماجی کارکن ہیں۔ روب کے کچرا پہننے کی وجہ لوگوں کو یہ دکھانا ہے کہ دراصل ایک شخص دن بھر میں کتنا کچرا کرتا ہے۔
لوگوں کو ان کی پھیلائی آلودگی کا احساس دلانا چاہتا ہوں
روب کہتے ہیں "ہم جو بھی کچرا کرتے ہیں ادھر ادھر پھینک دیتے ہیں وہ ہماری نظر سے دور ہوجاتا ہے اس لئے ہمیں پتہ ہی نہیں چلتا کہ ایک انسان دن بھر میں کتنا کچرا پھیلاتا ہے اور اس کی وجہ سے ماحول کو کس قدر نقصان پہنچ رہا ہے۔ میں جو بھی کچرا کرتا ہوں اپنے جسم میں پہنے ہوئے تھیلوں میں ڈال دیتا ہوں۔ یہ سب کرنے کا مقصد لوگوں کو ماحولیاتی آلودگی میں ان کے کردار کا احساس دلانا ہے"
1 مہینے تک کچرے کا تھیلا پہنوں گا
روب یہ کچرا پہن کر مختلف ہوٹلوں اور سڑکوں اور پارکس میں جاتے ہیں اور جو بھی ان کے لباس کے حوالے سے حیران ہو کر ان سے سوال کرے اسے وہ مکمل تفصیل سے جواب دیتے ہیں۔ روب کچرے سے بنے تھیلے ایک ماہ تک پہننے کا ارادہ رکھتے ہیں