پاکستان کرکٹ ٹیم نے سیمی فائنل تک پہنچانے میں مدد کرنے پر نیدر لینڈز کی ٹیم کو آئندہ ورلڈکپ کیلئے بڑے انعام سے نواز کر احسان کا بدلہ ہاتھ کے ہاتھ چکادیا۔
آسٹریلیا میں جاری ٹی ٹوئنٹی ورلڈکپ میں پاکستان کو دو میچوں میں شکست کے بعد سیمی فائنل میں رسائی مشکل تھی لیکن نیدر لینڈز کی ٹیم نے اہم میچ میں جنوبی افریقہ کو ہرا کر پاکستان کا راستہ صاف کردیا۔
دوسری جانب پاکستان نے بنگلہ دیش کو ہرادیا یوں جنوبی افریقہ شکست کے بعد سیمی فائنل کی دوڑ سے باہر ہوگیا ، پاکستان کی جیت کے ساتھ ساتھ جنوبی افریقہ کی شکست کی بھی قومی ٹیم کے سیمی فائنل میں پہنچنے کیلئے ضروری تھی اور یہ کام نیدر لینڈز نے کردیا۔
پاکستان نے اپنے آخری گروپ میچ میں بنگلہ دیش کو ہرا کر نیدر لینڈز کے احسان کا بدلہ یوں چکایا کہ اب نیدرلینڈز کو آئندہ ٹی ٹوئنٹی ورلڈکپ کا کوالیفائنگ راؤنڈ نہیں کھیلنا پڑے گا۔
نیدر لینڈز کی ٹیم پاکستان کی جانب سے بنگلہ دیش کو ہرانے کی وجہ سے پوائنٹس ٹیبل پر چوتھے نمبر پر آگئی ہے اور اس ایونٹ کی آٹھ بہترین ٹیموں کو اگلے ورلڈکپ کا کوالیفائنگ راؤنڈ نہیں کھیلنا پڑے گا۔