لاہور قلندرز کی جانب سے فرنچائز کیلئے کھیلنے والے قومی کھلاڑیوں تحفے میں دی گئی گاڑیوں کی تصاویر نمبر پلیٹس کی وجہ سے سوشل میڈیا پر وائرل ہوگئیں۔
فاسٹ بولر شاہین شاہ آفریدی، فخر زمان اور حارث رؤف کو گاڑیاں تحفے میں گئی ہیں، فخر زمان کو ہونڈا سٹی، شاہین شاہ آفریدی کو ٹویوٹا ریو ڈبل کیبن اور حارث رؤف کو 2022 کے ماڈل کی ہونڈا سوک بطور تحفہ دی گئی۔
کرکٹرز کو گاڑیاں دینے کی تقریب گورنمنٹ کالج یونیورسٹی کے گراؤنڈ میں سجائی گئی، لاہور قلندرز کی انتظامیہ اور کرکٹرز شاہین آفریدی، حارث رؤف اور فخر زمان کا تقریب کے لیے اوول گراؤنڈ پہنچنے پر شاندار استقبال کیا گیا۔
اس موقع پر لاہور قلندرز کے سی ای او عاطف رانا کا کہنا تھا کہ لاہور قلندرز کے کھلاڑی جوش و جذبے سے کھیلتے ہیں، ان کا خیال رکھنا بہت ضروری ہے۔
پاکستان سپر لیگ (پی ایس ایل) کی ٹیم لاہور قلندرز کے مالک عاطف رانا نے اپنی ذاتی گاڑی جو کہ بہت قیمتی ہے شاہین شاہ آفریدی کو تحفے میں دی ہے۔
اس سے پہلے بھی لاہور قلندرز کے شریک مالک اور عاطف رانا کے بھائی ثمین رانا کا کہنا تھا کہ لوگ شاہین کی عمر کے بارے میں بہت سوالات کرتے ہیں۔
شاہین آفریدی اب بھی نو عمر ہے لیکن اس کا دل بہت بڑا ہے کیونکہ جب بھی شاہین کو کوئی تحفہ ملتا ہے تو وہ اسے باقی کھلاڑیوں اور عملے میں بانٹ دیتا ہے۔
انہوں نے بتایا کہ ایک بار شاہین اور رانا عاطف ایک گاڑی پر ایک دوسرے سے مذاق کررہے تھے جو شاہین کو بہت پسند تھی، یہی وجہ ہے کہ شاہین کو اس کی پسند کی گاڑی کا تحفہ ملا۔
لاہور قلندرز نے نئی گاڑیوں کی نمبر پلیٹس پر تینوں کھلاڑیوں کی شرٹس کے نمبر لکھوائے ہیں اور فینسی نمبر پلیٹس کی وجہ سے گاڑیوں کی تصاویر سوشل میڈیا پر خوب وائرل ہورہی ہیں۔