پاکستان میں بجلی کی طویل بندش: ’یہ کوئی بڑا بحران نہیں ہے‘

پیر کی صبح کا آغاز اکثر پاکستانیوں کی جانب سے اس سوال سے ہوا کہ اچانک بجلی کیوں چلی گئی ہے، موبائل سگنل کیوں نہیں آ رہے اور دفتر جانے کے لیے گاڑی کیسے بک کروائی جائے۔

کسی کا فون چارج نہیں تھا، کسی کو انٹرنیٹ کی سہولت میسر نہیں تھیں اور کوئی ابھی تک یہی سوچرہا تھا کہ گھر سے باہر نکلا بھی جائے یا نہیں۔

تاہم کچھ ہی دیر میں سوشل میڈیا اور ٹی وی چینلز پر جیسے ہی یہ خبر چلنا شروع ہوئی کہ یہ مسئلہ کسی ایک شہر کا نہیں بلکہ تقریباً پاکستان کے تمام علاقوں کا ہے تو اس کے ساتھ ہی سوالات کی نوعیت بھی بدل گئی۔

تاہم پیر کی رات تک بجلی کی بحالی کا عمل شروع ہو چکا تھا۔

وزیرتوانائی خرم دستگیر کا کہنا تھا کہ وولٹیج کی فلکچویشن ہوئی جس کی وجہ سے سسٹم ایک ایک کرکے بند ہوئے ہیں، ان کا کہنا ہے کہ ابتدائی اطلاعات کے مطابق کوئی بڑا بحران نہیں ہے۔

خرم دستگیر کا کہنا تھا کہبریک ڈاؤن جنوب سے شمال تک آیا۔

وزیرِ توانائی کا کہنا تھا کہ ترسیلی نظام محفوظ رہا، بجلی کے بریک ڈاؤن کی تحقیقات کی جا رہی ہے اور بجلی کے بریک ڈاؤن کی بحالی پر کام ہو رہا ہے۔

بریک ڈاون کی وجوہات بتاتے ہوئے ان کا کہنا تھا کہ چونکہ سردیوں میں رات میں بجلی کی طلب کم ہوتی ہے اس لیے بہت سارے پاور سٹیشن بند کیے جاتے ہیں جنھیں صبح سات بجے ایک ایک کرکے آن کیا جاتا ہے اور اس دوران ’وولٹیج کی فلیکچوئیشن‘ ہوئی ہے جس سے سسٹم بریک ڈاؤن ہوا ہے۔

یار رہے اس سے قبل ان کا کہنا تھا کہ ’ابتدائی اطلاعات کے مطابق آج صبح 7:34 پر نیشنل گرڈ کی سسٹم فریکوئنسی کم ہوئی جس سے بجلی کے نظام میں وسیع بریک ڈاؤن ہوا اور اب سسٹم کی بحالی پر کام تیزی سےجاری ہے۔‘

https://twitter.com/kdastgirkhan/status/1617511210244505600?s=20&t=FnQrWrHpWHTKo0b-OIFkeg

خیال رہے کہ یہ پاکستان میں اپنی نوعیت کا کوئی پہلا بریک ڈاؤن نہیں ہے۔ پاکستان عوام کو تقریباً ہر موسمِ سرما میں اس طرح کے بجلی معطلی کا سامنا کرنا پڑتا ہے اور اس کی وجہ ٹرانسمیشن لائن میں اچانک ’فالٹ‘ آنا بتایا جاتا ہے۔

ایک سوال پر خرم دشتگیر کا کہنا تھا کہ ’کراچی کا معاملہ پیچیدہ ہے۔ کراچی کا بجلی کا اپنا سسٹم بھی موجود ہے۔ آئندہ چند گھنٹوں میں کراچی کو بجلی کی فراہمی بحال کر دی جائے گی۔‘

ادھر پاکستان ٹیلی کمیونیکیشن اتھارٹی کا کہنا ہے کہ ملک بھر میں بجلی کی بندش کے باعث صارفین کو سروسز کی فراہمی میں خلل کا سامنا کرنا  پڑ سکتا ہے۔

اس ضمن میں موبائل فون آپریٹروں کو اپنے متعلقہ صارفین کو صورتحال کے حوالے سے مطلع کر نے کو کہا گیا ہے  اور سائٹس کی زیادہ سے زیادہ تعداد کو جنریٹر کے ذریعے فعال رکھنے کی ہدایت کی گئی ہے۔

https://twitter.com/IESCO_Official/status/1617394798234591232?s=20&t=SJsYJDBQvyzF5VYBQ-edlA

ترجمان اسلام آباد الیکٹرک پاور سپلائی کمپنی (آئیسکو) نے بتایا کہ ’بریک ڈاؤن کی وجہ سے آئیسکو کے تقریباً 117 گرڈ اسٹیشن متاثر ہوئےہیں‘۔

ان کا کہنا تھا کہ مرکزی کنٹرول روم سے سسٹم بحالی کی براہ راست نگرانی جاری ہے، سسٹم کو نقصان سے بچانے کی لئے فیڈرز پر بجلی مرحلہ وار بحال کی جا رہی ہے۔

https://twitter.com/imranrana21/status/1617377504523599874?s=20&t=1UknkXxnkKtd5c9Ya8gZtQ

بریک ڈاؤن کی وجہ کیا بنی؟

خرم دستگیر کے مطابق 'یہ کوئی بڑا بریک ڈاؤن نہیں ہے، موسم سرما میں ملک بھر میں بجلی کی طلب کم ہونے اور معاشی اقدام کے تحت ہم رات کے وقت بجلی پیدا کرنے کے نظام کو عارضی طور پر بند کر دیتے ہیں، تاہم آج صبح جب سسٹم کو فعال کیا گیا تو دادو اور جامشورو کے درمیان کہیں فریکوئنسی اور وولٹیج میں اتار چڑھاؤ دیکھا گیا۔‘

انھوں نے مزید کہا کہ پشاور اور اسلام آباد میں گرڈ سٹیشنز کی بحالی شروع ہو چکی ہے، میں یقین دلاتا ہوں کہ اگلے 12 گھنٹوں میں پورے ملک میں بجلی مکمل طور پر بحال کر دی جائے گی۔‘

این ٹی ڈی سی کے ایک عہدیدار نے بی بی سی کو بتایا کہ یہ خرابی گدو کوئٹہ ٹرانسمیشن لائن میں آئی تھی۔ ان کے مطابق ایسی خرابی چند سیکنڈ میں رونما ہوتی ہے اور پھر اس سے بریک ڈاؤن ہو جاتا ہے۔‘

ان کے مطابق اس بریک ڈاؤن کی وجہ ٹرانسمیشن سسٹم کا پرانا ہونا، دھند کی وجہ سے لائنز میں نمی کا ہو جانا اور پھر بعض دفعہ فریکوئنسی میچ نہ کرنے کی وجہ بھی بجلی کی فراہمی میں تعطل کی وجہ بن جاتی ہے۔

یہ بھی پڑھیے

پاکستان میں رواں ماہ بجلی کا دوسرا بڑا بریک ڈاؤن، دو صوبے متاثر

لوڈشیڈنگ: ضرورت سے زیادہ بجلی پیدا کرنے میں پاکستان کو کیا نقصان ہے؟

بحالی کا سلسلہ مرحلہ وار جاری، گڈو بیراج کے سات اہلکار غفلت پر معطل

ایک سوال کے جواب میں ان کاکہنا تھا کہ اگر وقت پر کسی فالٹ کے بارے میں پتا چل جائے تو پھر ایسے میں اس ٹرانسمشن لائن کو آئسولیٹ کر دیا جاتا ہے مگر یہ سب بہت کم وقت پر ہی ممکن ہوتا ہے۔

تاہم وزیر توانائی خرم دستگیر نے صرف وولٹیج فلکچوئیشن کو ہی ہی بریک ڈاؤن کی وجہ بتایا ہے۔

ماہرین کے مطابق بریک ڈاؤن سے جہاں روزگار زندگی متاثر ہوتے ہیں وہیں ہیوی انڈسٹری کا نظامبھی ٹھپ ہو کر رہ جاتا ہے کیونکہ ایسی صنعت کو ’بیک اپ سپورٹ‘ بھی کافی دیر تک میسر نہیں ہوتی۔

کراچی میں بجلی سپلائی کے محکمے کے اہلکار نے بتایا کہ بریک ڈاؤن سے شہر میں پانی کے پمپ بند ہو گئے ہیں جس سے پانی کی فراہمی متاثر ہوئی ہے۔

سوشل میڈیا پر ردعمل

بریک ڈاؤن کے بارے میں اکثر صارفین کو معلوم ہی سوشل میڈیا کے ذریعے ہوا ہے جس کے بعد اب اس بارے میںبحث اور میمز کا سلسلہ جاری ہے۔

جہاں اس طرح کے واقعات کے مسلسل رونما ہونے پر صارفین سوالات اٹھا رہے ہیں تو وہیں بہت سے صارفین میمز بنا کر اپنا غم ہلکا کر رہے ہیں۔

صحافی عارفہ نور نے تبصرہ کیا کہ ’تقریباً ہر بار سردیوں میں ایسا بریک ڈاؤن رونما ہوتا ہے مگر ہم اس پر قابو پانے میں ناکام ہی رہتے ہیں۔‘

https://twitter.com/arifanoor72/status/1617374624202776580?s=20&t=oT9qwOeRz9moB4_xvw91rA

ایک صارف نے اس صورتحال پر تبصرہ کرتے ہوئے لکھا کہ ’جب پیر ہی ایسا ہو گا تو باقی ہفتے کا پھر کیا بنے گا۔‘

https://twitter.com/thisisemine/status/1617411470592974849?s=20&t=EAGcG_dn_28AgsJ1REY43g

ایک اور صارف نے ایسے لوگوں کی تصویر کشی کی ہے جن کے فون کی 20 فیصد سے کم چارجنگ رہ گئی ہے۔

https://twitter.com/notyourhayat/status/1617414256600944641?s=20&t=blQTrbpf2FzuoVoewQdgXw

کچھ صارفین وزیر توانائی کے اس بیان پر تنقید کر رہے ہیں جن میں انھوں نے کہا کہ یہ کوئی بڑا مسئلہ نہیں ہے اور 12 گھنٹے میں سب ٹھیک ہو جائے گا۔

ایک صارف نے سوال اٹھایا کہ کیا ہم پرانے ادوار میں جی رہے ہیں۔ انھوں نے اس بیان کو مضحکہ خیز قرار دیا ہے۔