لاہور میں 20 سالہ اسکول ٹیچر نے 45 سال کے نابینا شخص سے شادی کرکے معاشرے کیلئے نئی مثال قائم کردی، انوکھی شادی کیسے انجام پائی اور جوڑے کو کیا کیا مشکل پیش آئیں، آیئے آپ کو بتاتے ہیں۔
خاتون نے بتایا کہ میں نے میٹرک تک تعلیم حاصل کی اور میں اکیڈمی میں بچوں کو پڑھاتی تھی جہاں ان کا رشتہ آیا تاہم جب میں نے اپنے گھر والوں سے بات کی تو پہلے تو والد نے کوئی جواب نہیں دیا پھر ان کے اہل خانہ میرے گھر رشتہ لے کر آئے۔
انہوں نے کہا کہ خدا ترسی کی وجہ سے میں نے ان کا رشتہ قبول کیا، اللہ تعالیٰ نے مجھے آنکھیں دی ہیں تو میں نے سوچا کہ آنکھیں بن کر ان کا ساتھ دوں، دونوں خاندانوں کی رضا مندی کے بعد ہماری شادی ہوئی۔
خاتون نے بتایا کہ میری 3 بہنیں اور 3 بھائی ہیں، شروع میں میرے خاندان نے مخالفت کی لیکن میں پیدائشی طور پر ایک پاؤں سے معذور ہوں تو اس لیے گھر والوں نے کہا کہ یہ اچھا کماتے ہیں اور دونوں ایک دوسرے کا سہارا بن جاؤ گے تو زندگی اچھی گزرے گی۔
ہماری ایک بیٹی ہے جو 18 ماہ کی ہوچکی ہے، ہم کرائے کے گھر میں رہتے ہیں اور میرے شوہر چھڑی کے سہارے چلتے ہیں اور ماسک اور پین بیچ کر ہمارا گزر بسر ہوتا ہے۔