گھر دھنسنے کے واقعات صرف ٹھاٹھری میں نہیں، بلکہ پڑوسی ضلع رام بن کی کچھ بستیوں میں بھی رونما ہوئے ہیں۔
فِضا بانوفِضا بانو کے بھائی خالد نجیب کی شادی مارچ میں طے تھی۔ وہ انڈیا کے زیر انتظام کشمیر میں ٹھاٹھری میں دریائے چناب کے کنارے ایک پہاڑی پر آباد نئی بستی میں اپنی پانچ بہنوں اور والدہ کے ہمراہ 30 سال سے رہتے ہیں۔
فِضا کہتی ہیں کہ ایک دن بھائی کی شادی کی شاپنگ کے بعد وہ باقی بہنوں کے ساتھ سامان سنبھال رہی تھیں کہ خالد نے چھت سے سہمی ہوئی آواز میں کہا ’سب باہر نکلو، پہاڑ کھسک رہا ہے، ہمارا مکان بھی ٹوٹ رہا ہے۔‘
پھر جس کے ہاتھ جو سامان لگا اس نے وہ اُٹھایا اور چند منٹوں میں نئی بستی کے دیگر 80 مکانوں کی طرح فضا بانوکا گھر بھی خالی ہو گیا۔
اس وقت یہاں کے مکانوں میں چاروں طرف سے دراڑیں ہیں اور چھتیں بھی ٹوٹ چکی ہیں۔
30 سال بعد ایک اور ہجرت
انڈیا کے زیر انتظام کشمیر میں مسلح شورش شروع ہونے کے چند سال بعد ڈوڈہ کے دُور دراز علاقوں میں بھی مسلح تشدد کی کارروائیاں ہونے لگی تھیں اور سرکاری فورسز کی انسدادی کاروائیاں بھی ہو رہی تھیں۔
اسی دوران ان علاقوں سے سینکڑوں لوگوں نے امن کی تلاش میں ہجرت کی اور ٹھاٹری کی نئی بستی اسی ہجرت کے نتیجے میں بسی۔
خالد نجیب کہتے ہیں کہ ’میرے والد پولیس میں عارضی اہلکار تھے، برسوں بعد مستقل ہوئے۔ ہم یہاں آئے تو پہلے ایک منزل کا مکان بنایا، پھر کئی سال بعد دوسری منزل اور اب تیسری منزل بنا چکے تھے۔‘
’بینک اور لوگوں سے قرضے لے لے کر یہ گھر بن چکا تھا، میرے والد نے ہجرت کی اور ہم نئی بستی میں ہی پلے بڑے، لیکن یہ کبھی نہیں سوچا تھا کہ ایک اور ہجرت کرنا پڑے گی۔‘
خالدخالد کی دو بہنوں کی شادی ہو چکی ہے، لیکن باقی تین بہنوں اور ماں کے ہمراہ وہ اب ایک نزدیکی بستی میں کرایہ کے عوض دو کمروں میں گزارہ کر رہے ہیں۔
’لڑکی والوں نے کہا تھا کہ لڑکی کے والدین کو حج پر جانا ہے اس لیے اُس سے پہلے ہی شادی ہو گی۔ ہم سب اسی کام میں مصروف تھے۔ ٹائلیں خریدی تھیں، رنگ خریدا تھا، بہنیں بھی خوش تھیں۔ اب گھر ہی ختم ہو گیا تو وہ سارے خواب بھی اسی کے ساتھ ختم ہو گئے۔‘
خالد شاک میں ضرور ہیں، لیکن وہ کہتے ہیں کہ ایک نیا سفر شروع کرنے کے بغیر کوئی چارہ بھی نہیں۔
’میری بھی پڑھائی ادھوری ہے، تینوں بہنوں کی پڑھائی اور ان کی شادی کا بھی مسئلہ ہے۔ گھر کھونے سے میں بہت ڈپریس ہوں، لیکن اللہ نے چاہا تو میں ایک بار پھر کسی محفوظ جگہ پر گھر بناؤں گا۔‘
’سڑک پر بھی رہنا پڑے، پڑھائی نہیں چھوڑوں گی‘
15 سالہ فضا بانو نویں جماعت میں ہیں اور سکول کے پانچ بہترین طالب علموں میں شامل ہیں۔
انھیں بہت دُکھ ہے کہ وہ ایک خوشحال گھر سے محروم ہیں۔
وہ کہتی ہیں کہ ’اتنی کھلبلی مچی اُس دن، میں اپنی ساری کتابیں بھی نہیں اُٹھا سکی۔ ہمارے بھائی ہمارا بہت خیال رکھتے ہیں۔ فی الحال ہم کرایہ پر رہتے ہیں، لیکن اگر سڑک پر بھی رہنا پڑے تو میں پڑھائی کبھی نہیں چھوڑوں گی۔‘
تحصیل انتظامیہ نے ایک مقامی سکول میں متاثرین کی عارضی رہائش کا انتظام کیا تھا، تاہم مناسب سہولیات نہ ہونے کی وجہ سے انھوں نے نجی طور پر کرایہ کے گھروں میں شفٹ کیا ہے۔ لیکن ضلع انتظامیہ نے یقین دلایا ہے کہ کرایہ حکومت ادا کرے گی۔
زمین کیوں دھنسی؟
ڈوڈہٹھاٹھری کے تحصیلدار ساحِل رندھاوا کہتے ہیں کہ نئی دلی سے جیالوجیکل سروے آف انڈیا کے ماہرین کی ٹیم نے علاقے کا معائنہ کیا ہے اور ان کی رپورٹ اگلے ماہ تیار ہو گی۔
تاہم ان کا کہنا ہے کہ نقصان کا تخمینہ لگایا جا رہا ہے اور متاثرین کے لئے عارضی رہائش کا انتظام کیا جا رہا ہے۔
واضح رہے ڈوڈہ ضلع ہمالیائی سلسلے کی مغربی پٹی پر کئی پہاڑوں پر آباد ہے۔ تاہم ڈوڈہ سے ٹھاٹھری تک 30 کلومیٹر مسافت والی سڑک پر کام گزشتہ برس سے شروع ہوا ہے۔
چند مقامی لوگوں کا خیال ہے کہ زمین دھنسنے کی ایک وجہ یہی سڑک ہو سکتی ہے۔
نئی بستی کے ایک رہائشی نے نام ظاہر نہ کرنے کی شرط پر بتایا: ’سڑک بنانے کے لیے پہاڑوں کی بے تحاشا کٹائی کی گئی۔ جب سڑک پر راک کٹر (بڑی چٹانوں کو توڑنے کا آلہ) چلتا تھا تو زمین ہلتی تھی۔‘
انھوں نے کہا کہ ’میں کوئی ماہر نہیں ہوں، لیکن یہ ظاہر ہے کہ اتنے بڑے پیمانے پر پہاڑوں کی کٹائی ہوگی تو نتیجہ یہی ہو گا۔‘
یہ بھی پڑھیے
ہمالیہ کا وہ قصبہ جو آہستہ آہستہ زمین میں دھنستا جا رہا ہے
’بزرگ کی کرامت‘ یا زمین کی ساخت: نوشہرہ کی ’پختہ مسجد‘ جو زمین میں دھنس رہی ہے
کروشیا: یورپی دیہات میں اچانک پانی کے بڑے بڑے درجنوں گڑھے نمودار، ماہرین پریشان
خطرے کی گھنٹی؟
گھر دھنسنے کے واقعات صرف ٹھاٹھری میں نہیں، بلکہ پڑوسی ضلع رام بن کی کچھ بستیوں میں بھی رونما ہوئے ہیں۔ گزشتہ چند برسوں سے کشمیر کو انڈیا کے ساتھ ملانے والے واحد راستے ’سرینگر۔جموں ہائی وے‘ پر سفر کو آسان بنانے کی غرض سے حکومت نے کئی منصوبے ایک ساتھ شروع کیے ہیں۔
ان میں کئی سُرنگیں اور ایشیا کا سب سے اونچے ریلوے پُل کا منصوبہ بھی شامل ہے۔ 9 کلومیٹر مسافت کی ناشری۔چنانی ٹنل پر ٹریفک چل رہا ہے اور اس کی بدولت 12 گھنٹے کا سفر سات گھنٹوں تک سمٹ گیا ہے۔
اس حوالے سے لوگ خوش بھی ہیں، لیکن رام بن اور ڈوڈہ کے باشندوں کا کہنا ہے کہ ’جموں اور کشمیر پہلے ہی زلزلوں سے متعلق زون چار اور زون پانچ میں ہیں۔ پہاڑوں کی توڑ پھوڑ کہیں کوئی بڑی آفت نہ لے آئے۔‘
ان کا کہنا ہے کہ ’حکومت کو یقین دلانا چاہیے کہ یہ سب ماہرین کی رائے سے ہو رہا ہے۔‘