انڈین وزیراعظم نریندر مودی کا نام ’غلط‘ لینے پر کانگریس رہنما کے خلاف ایف آئی آر درج

کانگریس کے سینیئر رہنما اور ترجمان پون کھیڑا ان دنوں حکمراں جماعت بی جے پی کے نشانے پر ہیں اور سوشل میڈیا پر انھیں ٹرول کیا جا رہا ہے۔

اس کی وجہ یہ ہے کہ وہ گذشتہ دنوں ایک پریس کانفرنس کے دوران انڈیا کے وزیر اعظم نریندر مودی کا خاندانی نام بھول گئے تھے۔ خیال رہے کہ وزیر اعظم مودی کے نام میں شامل حصہ دامودر داس ان کے والد کا نام ہے اور اس طرح ان کا پورا نام نریندر دامودر داس مودی ہے۔

اس کی وجہ سے ان کے خلاف کم از کم دو مختلف جگہوں پر ایف آئی آر درج کی گئی ہیں۔

پون کھیڑا نے کیا کہا؟

کانگریس کے ترجمان اور میڈیا بریفنگ کے سربراہ پون کھیڑا انڈین ارب پتی تاجر گوتم اڈانی پر ہنڈن برگ کی رپورٹ کے بعد جوائنٹ پارلیمانی کمیٹی (جے پی سی) کی تشکیل کے مطالبے کا ذکر کر رہے تھے۔

خیال رہے کہ وزیر اعظم مودی پر گوتم اڈانی کی مدد کا الزام لگایا جاتا ہے۔ کانگریس رہنما راہل گاندھی نے بارہا کہا ہے کہ وزیراعظم صرف امبانی اور اڈانی کا خیال رکھتے ہیں۔

https://twitter.com/Pawankhera/status/1626510186952429572

پون کھیڑا نے جے پی سی کی تشکیل کے مطالبے کا ذکر کرتے ہوئے کہا ’پارلیمنٹ میں بحث سے کیوں بھاگ رہے ہو؟ جے پی سی سے کیوں ڈرتے ہو؟ یہاں تک کہ پی وی نرسمہا راؤ (کانگریس رہنما) اور اٹل بہاری واجپائی (بی جے پی رہنما) نے بطور وزیر اعظم اپنے دور میں جے پی سی قائم کیں۔ نریندر ’گوتم داس‘، 'دامودر داس' کو جے پی سی سے کیا مسئلہ ہے؟‘

پھر پریس کانفرنس میں انھیں پاس بیٹھے ایک شخص سے پوچھتے ہوئے دیکھا گیا کہ ’گوتم داس ہے یا دامودر داس؟‘۔ پھر انھوں نے کہا کہ ’نام میں دامودر داس ہے لیکن اعمال گوتم داس کے ہیں۔‘

بعد میں پون کھیڑا نے ٹویٹ کرتے ہوئے لکھا کہ ’میں واقعی کنفیوژ ہو گیا تھا کہ دامودر داس ہے یا گوتم داس۔۔۔‘

’ملک کانگریسیوں کے ایسے خوفناک بیان کو معاف نہیں کرے گا‘

آسام کے وزیر اعلی ہمنتو بسوا سرما نے پون کھیڑا کے بیان کو تنقید کا نشانہ بناتے ہوئے کہا کہ ’ملک کانگریسیوں کے ایسے خوفناک بیان کو معاف نہیں کرے گا۔‘

دوسری جانب انڈیا کے وزیر داخلہ امت شاہ نے کہا ہے کہ جب جب کانگریس نے وزیر اعظم کا مذاق اڑایا ہے انھیں انتخابات میں ہزیمت کا سامنا ہوا ہے۔

انڈیا کی شمال مشرقی ریاست ناگالینڈ میں ایک انتخابی ریلی سے خطاب کرتے ہوئے امت شاہ نے کہا کہ ’سنہ 2019 میں راہل گاندھی نے وزیر اعظم مودی کے خلاف خراب زبان کا استعمال کیا تو کانگریس حزب اختلاف کی حیثیت بھی کھو بیٹھی۔‘

یہ بھی پڑھیے

انڈیا کے امیر ترین افراد میں شامل گوتم اڈانی کا وزیراعظم مودی سے کیا تعلق ہے؟

کیا انڈین وزیرِ اعظم اپنی بات کہنے اور سخت سوالات کے جواب دینے کے ماہر ہیں؟

نریندر مودی کی تعلیم اور یوم پیدائش پر تنازع

انھوں نے کہا کہ کانگریس نے جس زبان کا آج استعمال کیا ہے اس کا جواب لوگ بیلٹ باکس میں دیں گے۔

انڈین خبر رساں ایجنسی کے مطابق انھوں نے مزید کہا کہ ’سنہ 2024 کے عام انتخابات میں کانگریس دوربین سے دیکھنے سے بھی نظر نہیں آئے گی۔‘

اس کے بعد ان کے جواب میں کانگریس پارٹی کے صدر ملیکارجن کھرگے نے منگل کو کہا کہ ’سنہ 2024 کے عام انتخابات میں کانگریس کی قیادت میں حکومت آئے گی، چاہے 100 مودی اور شاہ آ جائیں۔‘

اے این آئی کے مطابق بی جے پی آئی ٹی سیل کے رہنما امت مالویہ نے کہا کہ ’اس طرح کے بیان سے کانگریس نے اپنی سیاست کی سطح کو مزید نیچے گرا دیا ہے۔‘

انھوں نے کہا کہ ’یہ پہلی بار نہیں ہے کہ کانگریس نے وزیر اعظم پر ذاتی حملہ کیا ہے۔ کانگریس مسلسل ان کی ذات، ان کی گھریلو زندگی اور ان کے پس منظر پر حملہ کرتی رہی ہے۔‘

لکھنؤ میں ایف آئی آر درج

اتر پردیش پولیس نے پیر کو شہر میں مقیم بی جے پی لیڈر مکیش شرما کی شکایت کے بعد کھیرا کے خلاف مقدمہ درج کیا ہے۔

مقامی بی جے پی لیڈر اور ایم ایل سی مکیششرما نے الزام لگایا کہ کانگریس لیڈر نے وزیر اعظم نریندر مودی کے مرے ہوئے والد کا ’دانستہ طور پر مذاق اڑایا‘۔

ایک پولیس اہلکار نے کہا کہ یہ مقدمہ لکھنؤ کے حضرت گنج پولیس سٹیشن میں دفعہ 153-A (مختلف گروہوں کے درمیان دشمنی کو فروغ دینے)، 500 (ہتک عزت)، 504 (امن کے خلاف اکسانے کے ارادے سے دانستہ طور پر توہین) اور 505 (2) (مختلف طبقوں کے درمیان دشمنی، نفرت پیدا کرنے والے یا فروغ دینے والے بیانات) کے تحت درج کیا گیا ہے۔

انڈین میڈیا کے مطابق ایک دوسری ایف آئی آر بھی درج کی گئی ہے۔

سوشل میڈیا پر رد عمل

وسیم اکرم تیاگی نام کے ایک صارف نے پون کھیڑا کی جانب سے وزیر اعظم نریندر مودی کا نام غلط لیے جانے پر ہونے والی ایف آئی آر کی خبر کے ساتھ انڈیا کے ایک معروف اینکر امیش دیوگن کی ایک پرانی کلپ شیئر کی ہے جس میں وہ انڈیا کے بابائے قوم کہلانے والے کانگریس رہنما مہاتما گاندھی کا نام لینے میں غلطی کر جاتے ہیں۔ وسیم اکرم تیاگی نے اس بابائے قوم کا مذاق اڑانے کے مترادف قرار دیا ہے۔

https://twitter.com/WasimAkramTyagi/status/1627733471501361153

دوسری جانب سوریندر راجپوت نے لکھا کہ 'کل ہونے والی ایف آئی آر کے بعد پون کھیڑا جی کانگریس کی آواز ہی نہیں انداز بھی بن گئے۔‘

اس سے قبل کانگریس کے ایک سینیئر رہنما منی شنکر ائیر نے جب نریندر مودی کے لیے ایک نازیبا لفظ کا استعمال کیا تھا تو کانگریس نے ان سے کنارہ کشی کر لی تھی۔