اٹلی میں اتوار کو تارکین وطن کی کشتی الٹنے کے واقعے میں چار پاکستانیوں کی ہلاکت کی تصدیق ہوگئی ہے جن میں خواتین کی قومی ہاکی اور فٹ بال ٹیم کی کھلاڑی شاہدہ رضا بھی شامل ہے۔
منگل کو پاکستان کے دفتر خارجہ نے تصدیق کی ہے کہ اٹلی میں کشتی ڈوبنے کے واقعے میں چار پاکستانیوں کی ہلاکت ہوئی۔دفتر خارجہ کے بیان کے مطابق ’نہایت افسوس کے ساتھ اطلاع دی جاتی ہے کہ ابتدائی رپورٹس کے مطابق لیبیا میں بن غازی کے مقام پر کشتی الٹنے سے چار پاکستانی ہلاک ہو گئے۔ تریپولی میں پاکستانی سفارت خانہ لاشوں کو پاکستان پہنچانے کے انتظامات کر رہا ہے۔‘ہلاک ہونے والے پاکستانیوں میں قومی ہاکی ٹیم کی خاتون کھلاڑی شاہدہ رضا بھی شامل ہے۔کوئٹہ سے تعلق رکھنے والی شاہدہ رضا (چنٹو ) پاکستان وومن ہاکی ٹیم کی نمائئندگی کرنے کے ساتھ ساتھ فٹبال کی قومی کھلاڑی بھی تھیں۔ بلوچستان ہاکی ایسوسی ایشن کے جنرل سیکریٹری سید امین نے کوئٹہ میں اردو نیوز کے نامہ نگار زین الدین سے گفتگو کرتے ہوئے کشتی حادثے میں شاہدہ رضا کی ہلاکت کی تصدیق کر دی۔دوسری جانب پاکستان ہاکی فیڈریشن اور پی ایچ ایف وومن ونگ کے عہدیداروں بشمول سیدہ شہلا رضا، تنزیلہ عامر چیمہ اور دیگر نے شاہدہ رضا کی کشتی حادثے میں فوتگی پر دکھ کا اظہار کیا ہے۔