امریکی حکام کے مطابق ریاست کینٹکی میں بدھ کی رات امریکی فوج کے دو ہیلی کاپٹر گر کر تباہ ہونے سے نو افراد ہلاک ہو گئے ہیں۔
امریکی حکام کے مطابق ریاست کینٹکی میں بدھ کی رات امریکی فوج کے دو بلیک ہاک ہیلی کاپٹر گر کر تباہ ہونے سے نو افراد ہلاک ہو گئے ہیں۔
یہ حادثہ 101 ویں ایئر بورن ڈویژن کے ہیلی کاپٹروں کو اس وقت پیش آیا جب وہ ایک فوجی اڈے کے قریب تربیتی مشن میں مصروف تھے۔
فوجی حکام نے اس واقعے میں نو فوجیوں کی ہلاکت کی تصدیق کرتے ہوئے کہا کہ یہ ایک المناک نقصان ہے۔
یہ حادثہ مقامی وقت کے مطابق تقریباً 22:00 بجے (02:00 GMT) فورٹ کیمبل فوجی اڈے کے قریب ہوا۔
یہ واضح نہیں ہے کہ حادثے کی وجہ کیا ہے تاہم حکام کے مطابق اس کی تحقیقات جاری ہیں۔
اس سے قبل بی بی سی نیوز کو دیے ایک بیان میں، امریکی فوج کے ایک ترجمان نے کہا کہ دو HH60 بلیک ہاک ہیلی کاپٹر ’معمول کے تربیتی مشن‘ کے دوران گر کر تباہ ہوئے۔
بیان میں مزید کہا گیا کہ ’کمان فی الحال سروس کے ارکان اور ان کے خاندانوں کی دیکھ بھال میں مرکوز ہے۔‘
یہ بھی پڑھیے
ہیلی کاپٹر حادثے میں یوکرین کے وزیر داخلہ سمیت 14 افراد ہلاک
کور کمانڈر کوئٹہ کے ہیلی کاپٹر کا ملبہ کہاں سے اور کیسے ملا؟
بی بی سی کے اس سوال کے جواب میں کہ کیا دونوں ہیلی کاپٹر ایک دوسرے سے ٹکرا گئے تھے، ترجمان نے کہا کہ وہ اس وقت تفصیلات کی تصدیق کرنے سے قاصر ہیں۔
امریکی فوج کی ویب سائٹ کے مطابق، 101 ویں ایئر بورن ڈویژن امریکی فوج کا فضائی حملے کرنے والا واحد ڈویژن ہے جسے بین الاقوامی سطح پر تنازعات والے علاقوں میں بھیجا جاتا ہے۔
