پاکستان کے وزیر خزانہ اسحاق ڈار نے کہا کہ ہے کہ یواے ای کی جانب سے آئی ایم ایف کو پاکستان کے لیے ایک بلین ڈالر کی دوطرفہ امداد کی تصدیق کر دی گئی ہے۔
وزیر خزانہ کا کہنا ہے کہ اسٹیٹ بینک اماراتی حکام سے ڈیپازٹ لینے کے لیے دستاویزات مکمل کرنے میں مصروف ہے۔
واضح رہے کہ وزارت خزانہ کے ذرائع کے مطابق متحدہ عرب امارات سے ایک ارب ڈالر کی فنانسنگ کے لیے معاملات فائنل ہوچکے ہیں۔
وزارت خزانہ کے ذرائع کے مطابق اب آئی ایم ایف سے سٹاف لیول معاہدہ ہونے میں صرف سعودی عرب کی جانب سے تصدیق ہونا باقی ہے۔
ذرائع کے مطابق اگلے ہفتے سعودی عرب سے 2 ارب ڈالرز کی فنانسنگ کا امکان ہے، سعودی عرب سے تصدیق کے بعد آئی ایم ایف کی بیرونی فنانسنگ کی شرائط پوری ہو جائیں گی۔