نائلہ کیانی نے نیپال میں واقع دنیا کی دسویں بلند ترین چوٹی انا پورنا چوٹی کو سر کرنے والی پہلی پاکستانی خاتون کا اعزاز حاصل کرلیا، شہزوز کاشف اور ساجد سدپارہ نے بھی اعزازات اپنے نام کرلئے۔
نائلہ کیانی پیر کی صبح ماؤنٹ انا پورنا کے ٹاپ پر پہنچیں، نائلہ کیانی 8 ہزار میٹر سے بلند 4 چوٹیاں سر کرنے والی پہلی پاکستانی خاتون ہیں اور اس سے قبل کے ٹو، گیشربرم ون اور گیشر برم ٹو سر کرچکی ہیں۔ نائلہ نے پاکستانی کوہ پیماء شہروز کاشف کے ساتھ ہی انا پورنا کو سر کیا۔
21 سالہ کوہ پیما شہروز کاشف ماؤنٹ اناپورنا کو سر کرنے کے بعد دنیا کی 11 بلند ترین چوٹیاں سر کرنے والے کم عمر کوہ پیما بن گئے جبکہ ہفتے کے روز کوہ پیما ساجد سد پارہ نے بغیر مصنوعی آکسیجن کے انا پورنا پہاڑ کو سر کیا تھا۔
کوہ پیمائی کا شوق رکھنے والی راولپنڈی کے علاقے گجر خان سے تعلق رکھنے والی نائلہ کیانی نے ایرو سپیس انجینئرنگ کی تعلیم برطانیہ سے حاصل کی اور اس وقت وہ خاوند کے ہمراہ دبئی میں مقیم ہیں جہاں وہ بینکنگ کے شعبے سے وابستہ ہیں۔
یاد رہے کہ کوہ پیمائی کی دنیا میں آٹھ ہزار میٹر سے بلند پہاڑوں کو کرنا ایک اعزاز سمجھا جاتا ہے اور نائلہ کیانی آٹھ ہزار میٹر سے زیادہ بلند چار چوٹیوں کو سر کرنے والی پہلی پاکستانی خاتون بھی بن گئی ہیں جس پر پوری دنیا ان کی صلاحیتوں کا اعتراف کررہی ہے۔