متحدہ عرب امارات نے یو اے ای جانے کے خواہشمند پاکستانیوں کیلئے کراچی میں ایشیا کا سب سے بڑا ویزا سینٹر قائم کردیا۔
کراچی میں قائم ویزا سینٹر میں عوام کی سہولت کے لیے 11 کاؤنٹر بنائے گئے ہیں، ویزا سینٹر کے قیام سے ویزے کے حصول کے لیے عوام کو ایجنٹوں سے نجات ملے گی جبکہ اسلام آباد جانے کی ضرورت بھی نہیں ہوگی۔
اس سے قبل متحدہ عرب امارات کے سفیر حماد عبید الزابی نے کہا تھا کہ وہ کراچی میں ویزا سینٹر کھول رہے ہیں جو ایشیا میں اس قسم کی سب سے بڑی سہولت ہوگی۔
کراچی کے ایوانِ صنعت و تجارت کے دورے کےموقع پر سفیر حماد عبید الزابی نے بتایا تھا کہ بہت جلد اس قسم کا مرکز اسلام آباد میں بھی کام کا آغاز کردے گا جس میں میڈیکل انشورنس، طبی معائنے اور کانٹریکٹس سمیت ہر سہولت میسر ہوگی۔ کراچی کے خیابانِ شمشیر میں اس ویزا سینٹر کے لیے پوری ٹیم یو اے ای سے آئے گی۔