کرکٹ ماضی میں ایک پرسکون کھیل ہوتا تھا جب پورا پورا دن کھیل کر بھی بلے باز چند رنز بناتے تھے لیکن ٹی ٹوئنٹی کے دور میں کھیل کا انداز بالکل بدل چکا ہے اور کھلاڑی زیادہ سے زیادہ رنز بنانے کیلئے بے چین نظر آتے ہیں اور کوشش کرتے ہیں کہ ہر گیند کو باؤنڈری کے باہر پہنچایا جائے، آج ہم آپ کو ایک ایسی ویڈیو دکھائیں گے جس میں کھلاڑی نے ایک اوور میں سب سے زیادہ رنز بنانے کی تاریخ رقم کردی ہے۔
سرگیری سوبرز نے پہلی بار ایک اوور میں چھ چھکے لگائے تھے جس کے بعد روی شاستری نے فرسٹ کلاس کرکٹ میں چھ چھکے مارے،ہرشل گبزنےانٹرنیشنل کرکٹ میں پہلی بارچھ چھکے لگائے جب کہ کیرن پولارڈ نے سری لنکا کے خلاف ٹی ٹوئنٹی میں چھ چھکے لگائے۔
بھارت کے یوروراج سنگھ اور حال ہی میں پاکستان کرکٹ ٹیم کے چاچا افتخار نے بھی ایک اوور میں 36 رنز بنانے کا کارنامہ انجام دیا لیکن اب ایک کھلاڑی نے ان سب سے زیادہ یعنی ایک اوور میں 46 رنز بھی بنا دیے ہیں۔
کویت میں فرنچائز لیگ کے ٹی ٹوئنٹی میچ میں بالر نے اوور کی پہلی ہی گیند ’نو بال‘ کرائی جس پر بیٹر نے چھکا مار دیا جس کے بعد کی گیند پر 4 بائز کے رنز بھی ملے اور پھر اوور کی دیگر 5 گیندوں پر بیٹر نے 5 چھکے مارے جن میں سے ایک چھکا دوبارہ ’نوبال‘ پر مارا گیا۔اسپن بولر نے اوور کی آخری گیند پر باؤنڈری دے کر مکمل اوور میں 46 رنز دیے۔