انڈین پرئمیر لیگ کے دوران اسٹار بلے باز ویرات کوہلی سمیت رائل چیلنجرز بنگلور کی پوری ٹیم مسلمان کرکٹر محمد سراج کے گھر پہنچ گئی۔
وائرل ہونے والی ویڈیو میں رائل چیلنجرز بنگلور کے ویرات کوہلی اور کپتان فاف ڈو پلیسس کو حیدرآباد میں اپنے فاسٹ بولر محمد سراج کے نئے تعمیر شدہ گھر میں دیکھا گیا۔
کوہلی اور ڈو پلیسس کے علاوہ، کیدار جادھو، وین پارنیل، سنجے بنگر، انوج راوت، جوش ہیزل ووڈ، مہیپال لومرور، سویاش پربھودیسائی، کرن شرما اور سدھارتھ بھی موجود تھے۔ ویڈیو میں دیکھا جا سکتا ہے کہ آر سی بی کے کھلاڑی سراج کو گلے لگا کر ان کے نئے گھر کے لیے مبارکباد دے رہے ہیں۔
محمد سراج نے نیا گھر جوبلی ہلز فلم نگر حیدرآباد بنایا ہے، ایک مداح نے ٹوئٹر پر سراج کے گھر پہنچنے والے ستاروں کی ویڈیو شیئر کی، بعد میں آر سی بی کے آفیشل سوشل میڈیا پیج سے تصاویر بھی پوسٹ کی گئیں۔
یاد رہے کہ چند روز قبل ایک انٹرویو میں سراج نے اپنے بچپن سے کامیابی تک کے سفر کے بارے میں بتایا تھا کہ بچپن میں انہیں کس قسم کی مشکلات کا سامنا کرنا پڑا۔
سراج نے بتایا کہ ان کا بچپن کافی غریبی میں گزرا ہے۔ ان کے والد آٹو رکشہ چلاتے تھے۔ یہاں تک کہ شروعاتی دنوں میں ان کے پاس پریکٹس کے لیے جوتے تک نہیں ہوتے تھے۔ اس کے باوجود انہوں نے سخت محنت کی اور آج بھارت کے بہترین گیند باز بن چکے ہیں۔