ضعیف العمر امریکی صدرجوبائیڈن ایک تقریب کے دوران اسٹیج پر چھوٹے سے تھیلے سے ٹکرا کر گر گئے، ساتھ موجود لوگوں نے اٹھایا۔
صدر بائیڈن ایئر فورس اکیڈمی میں کیڈٹس کو ڈگری دینے کی تقریب میں شریک تھے جہاں اسٹیج پر ریت کے تھیلے سے الجھ کر گرنے کا واقعہ پیش آیا۔
80 سالہ جوبائیڈن امریکی تاریخ کے معمر ترین صدر ہیں اور صدارت سنبھالنے کے بعد وہ کئی بار لڑکھڑا چکے ہیں، تقریب میں گرنے پر ایئرفورس کے اہلکاروں نے صدر کو سنبھالا اور دوبارہ کھڑا کیا ۔صدر بائیڈن جیسے ہی گرے تو اسٹیج پر موجود اہلکاروں نے انہیں سہارا دے کر کھڑا کیا۔
امریکی صدر کے گرنے کی ویڈیو سوشل میڈیا پر وائرل ہونے کے بعد صارفین کی جانب سے مختلف تبصرے بھی کیے جارہے ہیں جبکہ وائٹ ہاؤس کے مطابق امریکی صدر جوبائیڈن بالکل ٹھیک ہیں، انہیں کسی قسم کی چوٹ نہیں آئی۔
صدر بائیڈن کے گرنے کا یہ پہلا واقعہ نہیں ہے امریکی صدر اپنی بزرگی کی وجہ سے اس قبل بھی کئی بار لڑکھڑا چکے ہیں جبکہ امریکی صدر گرنے کے باوجود تقریب کے اختتام تک موجود رہے۔