فلسطینیوں پر اسرائیلی مظالم کی داستان ایسی ہے جو ختم ہونے کا نام ہی نہیں لے رہی، روزانہ نہ جانے کتنے معصوم اس ظلم و جبر کا شکار ہو رہے ہیں جن میں بچے بھی شامل ہیں۔
بیں الاقوامی خبر رساں ادارے کے مطابق، مقبوضہ مغربی کنارے میں اسرائیلی فوج کی فائرنگ سے 3 سالہ فلسطینی بچہ محمد التمیمی زخمی ہوا تھا، جو آج دم توڑ گیا۔
فلسطینی حکام کے مطابق، محمد التمیمی یکم جون کو اسرائیلی فوج کی فائرنگ سے زخمی ہوا تھا، بچے کو فوری طور پر اسپتال لے جایا گیا جہاں 5 دن تک اسکا علاج چلا، لیکن معصوم محمد زخموں کی تاب نہ لاتے ہوئے شہید ہو گیا۔
محمد التمیمی کی شہادت کے بعد اس کے والدین غم سے نڈھال ہیں، اور آج ہی اسکی ندفین بھی کردی گئی ہے۔
واقعے پر فلسطینی وزارت خارجہ کا کہنا ہے کہ، اسرائیلی فوج کی کارروائیوں سے متعلق اسرائیلی تحقیقات پر اعتبار نہیں، فلسطینی بچوں کے خلاف اسرائیلی جرائم کی بین الاقوامی تحقیقات کا مطالبہ کرتے ہیں۔
انہوں نے مزید کہا کہ، رواں برس مغربی کنارے اور غزہ میں اسرائیلی فوج کی فائرنگ سے اب تک 158 فلسطینی شہید ہو چکے ہیں