شیر اس وقت زمین پر سب سے خطرناک درندوں میں سے ایک ہے جو انسان کو لمحوں میں چیر پھاڑ کر کھانے کی طاقت رکھتا ہے لیکن انسان نے برسو ں سے شیر کو ایسا سدھایا ہے کہ جنگل کا بادشاہ انسانوں کے اشاروں پر بندر کی طرح رقص کرتا ہے اور کئی جگہوں پر تو شیر کو پالتو جانوروں کی طرح بھی پالا جاتا ہے، اس ویڈیو میں ایک خاتون شیر کے ساتھ ہم نوالہ ہے، ویڈیو نے سوشل میڈیا صارفین کو حیران کردیا ہے۔
متحدہ عرب امارات کے ایک چڑیا گھر میں خاتون اور خونخوار شیر ایک ہی پلیٹ میں کھانا کھارہے ہیں، ویڈیو راک چڑیا گھر (Rak Zoo) کی ہے جس میں خاتون کو شیر کے بالکل قریب بیٹھ کر کھانا کھاتے ہوئے دیکھا جا سکتا ہے۔
چڑیا گھر انتظامیہ نے اپنے انسٹاگرام پیج سے ویڈیو شیئر کرتے ہوئے لکھا کہ دنیا میں کہیں بھی ایسا منظر دیکھنے کو نہیں ملے گا سوائے راک چڑیا گھر کے، یہ اپنی نوعیت کی پہلی معیار کی خدمت ہے۔ویڈیو کو ہزاروں لوگوں نے دیکھا اور اپنی ٹائم لائن پر شیئر بھی کیا۔
ویڈیو میں دیکھا جاسکتا ہے کہ شیر پلیٹ میں رکھا گوشت کھا رہا ہے اور خاتون پلیٹ میں موجود چکن کے مزے لے رہی ہیں۔ ویڈیو دیکھنے والوں نے خاتون کی ہمت کو داد دی کیونکہ شیر خاتون پر حملہ آور ہو سکتا تھا۔