سڑکوں پر خرگوش ۔۔ گھروں میں خرگوش ۔۔ دیکھیں کیسے معصوم سے خرگوشوں نے لوگوں کا جینا محال کردیا؟

امریکا میں ننھے معصوم خرگوشوں نے آبادی پر دھاوا بول دیا، مقامی افراد پریشان ہوکر خرگوشوں کو مارنے کی ترکیبیں سوچنے لگے، کئی خرگوشوں کو پکڑ کر محفوظ مقام پر منتقل کردیا گیا۔

میڈیا رپورٹس کے مطابق فلوریڈا کے قصبے ولٹن مینرز میں سڑکوں اور گھروں کے باہر گھومتے خرگوش نظرآرہے ہیں، ایسا لگتا ہے کہ انہیں کسی نے یہاں چھوڑ دیا ہے۔

مقامی افراد کا کہنا ہے کہ ابتداء میں خرگوشوں کی تعداد کم تھی جس کی وجہ سے کسی نے توجہ نہیں دی لیکن اب یہ خرگوش بڑھ کر 100 سے زائد ہو چکے ہیں جو پریشانی کا باعث بن رہے ہیں اور اس وقت قصبے میں موجود خرگوش ایک سے دوسری جگہ پر بھاگتے نظر آتے ہیں۔

چھوٹے علاقے میں اتنی تعداد میں خرگوش عوام کےلئے مسائل پیدا کر رہے ہیں اور گھروں میں گھسنے کے علاوہ سڑکوں پر بھی لوگوں کیلئے پریشانی کا سبب بن رہے ہیں۔

قصبے کے کچھ لوگوں کا کہنا ہے کہ ان جانوروں کو آزادانہ گھومنے پھرنے دیا جائے اور مارا نہ جائے۔ کچھ لوگوں نے کہا ہے کہ وہ ان خرگوشوں پر اپنے پالتو سانپ چھوڑ دیں گے جو انہیں نوالہ بنا لیں گے۔ یا پھر انہیں گولی مار دی جائے۔

اس حوالے سے مکینوں کا کہنا ہے کہ محکمہ جنگلی حیات کو اس ضمن میں اپنا کردار ادا کرنا چاہیے جبکہ جانوروں کو بچانے والی ایک تنظیم نے اب تک 19 خرگوشوں کو پکڑ کر انہیں محفوظ مقام پر منتقل کردیا ہے۔