جدید ٹیکنالوجی جہاں ہمارے روزمرہ کی زندگی آسان بنا رہی ہے وہیں ایسا چونکا دینے والا واقعہ سامنے آیا ہے جس نے ثابت کیا ہے کہ ٹیکنالوجی ہماری حفاظت کے لئے بھی ناگزیر ہے اور روز بہ روز اس حوالے سے اہمیت اختیار کرتی جارہی ہے۔ لاس اینجلس میں موبائ فون کی ٹیکنالوجی کے ذریعے ایسے شخص کی جان بچا لی گئی جو 400 فٹ کھائی میں گاڑی سمیت جاگرا تھا۔ یہ کیسے ہوا؟ آئیے جانتے ہیں
21 جولائی کو لاس اینجلس کے قریب ماؤنٹ ولسن نامی علاقے میں حادثہ پیش آیا جس میں امریکی شخص کی گاڑی پوری طرح برباد ہوگئی البتہ خوش قسمتی سے اس شخص کے پاس آئی فون تھا جس میں موجود کریش ڈیٹیکشن فیچر کو حادثے کی سنگینی کا اندازہ ہوگیا تھا البتہ اس جگہ وائی فائی یا موبائل کوریج موجود نہیں تھی۔
اس کریش ڈیٹیکشن نے سیٹلائیٹ کے ذریعے خودکار طور پر ایس او ایس میسج امدادی اداروں کو ارسال کیا اور حادثے کی لوکیشن بھی بھیج دی۔ جبکہ اس دوران کار میں موجود شخص بری طرح زخمی اور اپنے حواس کھو چکا تھا۔
یہ میسج ملنے کے بعد کمیونیکیشن سینٹر کے ایک آپریٹر نے حادثے کی جگہ کے قریب موجود پولیس اہلکاروں سے رابطہ کرکے واقعے سے باخبر کیا اور فوری طور پر پولیس کی مدد آ پہنچی جہاںزخمی کو تلاش کر کے اسے طبی امداد دی گئی۔ پولیس کا کہنا ہے کہ اگر آئی فون نے مدد نہ کی ہوتی تو اس شخص کی جان جانا یقینی تھا۔