اکثر لوگوں کو پیسے جمع کرنے کا شوق ہوتا ہے اور کئی بار لوگ کسی خاص مقصد کیلئے باقاعدہ بچت کرکے پیسے جمع کرتے ہیں، ملائیشیا میں بھی ایک خاتون نے طویل عرصہ بچت کرکے ہزاروں ڈالر جمع کئے تاکہ حج کی ادائیگی کرسکے لیکن ایک معمولی سی غلطی نے تمام جمع پونجی تباہ کرکے رکھ دی ہے۔
کوالا لمپور کی مسلمان خاتون نے حج کے لیے زندگی بھر بچت کرکے کچھ رقم جمع کی تھی تاہم خاتون سے غلطی یہ ہوئی ہے کہ انہوں نے رقم ایک گتے کے ڈبے میں رکھی تھی۔
خاتون نے ملائیشین کرنسی میں 30 ہزار کے جمع کئے جو کہ ڈالروں میں 8700 کے قریب بنتے تھے لیکن رقم گتے کے ڈبے میں رکھنے کی وجہ سے تمام پیسوں کو دیمک نے برباد کردیا۔
خاتون کے پوتے نے واقعہ کے حوالے سے سوشل میڈیا پر ویڈیو اپ لوڈ کرتے ہوئے بتایا کہ ان کی دادی 2024 میں حج پر جانا چاہتی تھیں اور اسی لیے انہوں نے یہ رقم ایک طویل عرصے سے سنبھال رکھی تھی۔
خاتون کے پوتے خیرالاظہر نے تباہ حال نوٹوں کی تصاویر جاری کرتے ہوئے بتایا کہ کچھ نوٹ ادھ کھائے ہوئے تھے جنہیں لے کر وہ بینک گئے تھے کہ شاید اس سے کچھ رقم مل سکے لیکن بہت سارے نوٹ تار تار ہوکر ضائع ہوچکے ہیں۔
سوشل میڈیا صارفین نے خاتون کے ساتھ ہونیوالے اس حادثے پر افسوس کا اظہار کیا جبکہ کچھ لوگوں نے روایتی طور پر خاتون کو تنقید سے نوازا۔