پاکستان اور انڈیا کے میچ پر بی سی سی آئی کو میری تجویز پر عمل کرنا چاہیے تھا: نجم سیٹھی

 پاکستان کرکٹ بورڈ (پی سی بی) کے سابق چیئرمین مینیجمنٹ کمیٹی نجم سیٹھی نے کہا ہے کہ انڈین کرکٹ بورڈ (بی سی سی آئی) کو اُن کی تجویز پر عمل کرتے ہوئے ورلڈ کپ میں پاکستان کرکٹ ٹٰیم کے میچ نیوٹرل مقام پر شیڈول کرنے چاہیے تھے۔

نجم سیٹھی کا یہ بیان اتوار کے روز اُس وقت سامنے آیا جب انڈین کرکٹ بورڈ  پر حیدرآباد کرکٹ ایسوسی ایشن (ایچ سی اے) نے ورلڈ کپ میں شیڈول دو لگاتار میچوں پر تحفظات کا اظہار کیا۔

بی سی سی آئی کی جانب سے ورلڈ کپ شیڈول میں تبدیلیوں پر نجم سیٹھی نے اپنی ٹویٹ میں لکھا کہ ’بی سی سی آئی کو میری تجویز پر عمل کرتے ہوئے پاکستان کے ورلڈ کپ کے میچ نیوٹرل ملک میں کھیلنے دینے چاہیے تھے۔ اب ایک مرتبہ پھر سے وہ شیڈول میں پھنس گئے ہیں اور کچھ روز بعد اِس میں تبدیلیاں کی جا رہی ہیں۔‘ 

@BCCI should have taken my advice re @TheRealPCB playing their WC games in a neutral country :) They are now in a mess with schedule tweaks being proposed every few days!

— Najam Sethi (@najamsethi) August 20, 2023

خیال رہے رواں برس اکتوبر اور نومبر میں انڈیا میں ہونے والے آئی سی سی کرکٹ ورلڈ کپ کے شیڈول کے حوالے سے ایک مرتبہ پھر سے تنازع سر اٹھانے لگا ہے۔

ورلڈ کپ میں 9 اکتوبر کو نیدرلینڈز اور نیوزی لینڈ کا میچ حیدرآباد  دکن کے راجیو گاندھی انٹرنیشنل سٹیڈیم میں شیڈول ہے۔ اُس سے اگلے روز یعنی 10 اکتوبر کو اسی سٹیڈیم میں ہی پاکستان اور سری لنکا کا ڈے اینڈ نائٹ میچ شیڈول ہے۔

دوسری جانب بی سی سی آئی نے ایچ سی اے کو آگاہ کیا ہے کہ اُن کی جانب سے صورتحال کا جائزہ لیا جائے گا۔ (فوٹو: اے ایف پی)دو لگاتار میچوں کے باعث ایچ سی اے نے بی سی سی آئی کو اپنے تحفظات سے آگاہ کیا ہے۔

کرکٹ کی ویب سائٹ ’کرک انفو‘ کے مطابق ایچ سی اے نے بی سی سی آئی کو خبردار کیا ہے کہ دو لگاتار میچوں کے باعث حیدرآباد پولیس نے سکیورٹی کے حوالے سے تحفظات اٹھائے ہیں۔

دوسری جانب بی سی سی آئی نے ایچ سی اے کو آگاہ کیا ہے کہ اُن کی جانب سے صورتحال کا جائزہ لیا جائے گا۔

خیال رہے اس سے قبل پاکستان اور سری لنکا کے درمیان ورلڈ کپ کا یہ میچ 12 اکتوبر کو حیدرآباد دکن میں شیڈول تھا تاہم بی سی سی آئی نے شیڈول میں تبدیلی کی تھی جس کے بعد اِس میچ کی نئی تاریخ 10 اکتوبر کر دی گئی تھی۔

اسی طرح پاکستان اور انڈیا کی درمیان میچ 15 اکتوبر کو احمدآباد کے نریندر مودی سٹیڈیم میں شیڈول تھا جس کی نئی تاریخ اب 14 اکتوبر ہے۔