ورلڈ ایتھلیٹکس چیمپئن شپ میں جیولن تھرو کے مقابلے میں بھارت کے لیے گولڈ میڈل جیتنے والے نیرج چوپڑا کی والدہ نے سلور میڈل جیتنے والے پاکستانی ایتھلیٹ ارشدندیم سے متعلق سوال پر بھارتی صحافی کو خاموش کرادیا۔
آج کل سوشل میڈیا پر مقبول ترین جیولن تھرو اسٹارز ارشد ندیم اور نیرج چوپڑا کی دوستی کے چرچے ہو رہے ہیں۔ انہیں میدان میں بھی ایک دوسرے کی حوصلہ افزائی کرتے دیکھا جا چکا ہے۔ لیکن بھارتی صحافی نے نیرج چوپڑا کی والدہ سے ایسا سوال کیا جس پر انہوں نے صحافی کو خاموش کرا دیا۔
میڈیا سے گفتگو میں ایک صحافی نے نیرج چوپڑا کی والدہ سروج دیوی سے پوچھا کہ نیرج کا پاکستانی کو شکست دینا ان کے لیے کتنی بڑی کامیابی ہے؟
جواب دیتے ہوئے کھلاڑی کی والدہ نے کہا کہ میدان میں ملکوں کی کوئی تقسیم نہیں، تمام کھلاڑی برابر ہیں، میں ارشد ندیم کے لیے سلور میڈل جیتنے پر خوش ہوں۔
سروج دیوی کا کہنا تھاکہ میں نے کہا کہ دیکھو جی میدان میں جاؤ گے تو سارے کھلاڑی ہیں، کوئی نہ کوئی تو جیتے گا، پاکستان سے ہونا یا ہریانہ سے ہونا اس کی کوئی بات نہیں،میرے لیے خوشی کی بات ہے اور جو پاکستان سے جیتا ہے اس کے لیے بھی خوش ہوں۔