چین کے صوبے گوانگ ڈونگ میں میں طوفانی بارشوں کے دوران 70 سے زائد بڑے بڑے مگرمچھ ایک فارم سے فرار ہونے میں کامیاب ہوگئے جس کے بعد شہریوں کو گھروں میں رہنے کی ہدایت کردی گئی ہے۔
موسلا دھار بارشوں کے دوران گوانگ ڈونگ صوبے کے شہر ماؤمنگ کی انتظامیہ نے شہریوں کو خبردار کیا ہے کہ وہ گھروں میں رہیں کیونکہ 70 سے زیادہ مگرمچھ پورے شہر میں پھیل چکے ہیں۔
حکام کے مطابق کئی بالغ اور نابالغ مگرمچھ بھاگ گئے تھے جن میں سے کچھ کو پکڑ لیا گیا ہے لیکن ایک جھیل کی گہرائی کی وجہ سے یہ آپریشن مشکل ہورہا ہے۔ مگرمچھوں کی وجہ سے کسی حادثے یا شہری کے زخمی ہونے کی اطلاع نہیں ہے۔
یاد رہے کہ ہانگ کانگ اور جنوبی چین میں ریکارڈ توڑ بارشوں نے نظام زندگی درہم برہم کررکھا ہے۔ہانگ کانگ میں شدید بارشوں سے رہائشی علاقے زیر آب آگئے، سیلاب کی وجہ سے سڑکیں بہہ گئیں اور ٹرینوں سمیت ٹرانسپورٹ کا نظام بھی درہم برہم ہوگیا۔
جنوبی چین کے شہر شینزین کو بھی شدید بارشوں اور سیلابی صورتحال کا سامنا ہے جب کہ انتظامیہ نے سیلاب کی وجہ سے نشیبی علاقوں میں بسنے والوں کو گھروں سے نہ نکلنے کی بھی ہدایت کی ہے۔
خراب موسم کی سبب صوبے گوانگ ڈونگ میں سیکڑوں پروازوں کو معطل کردیا گیا، شہر میں ہونے والی اس بارش کو 1952 کے بعد سے اب تک کی بدترین بارش قرار دیا گیا ہے۔