سندھ کے ضلع سانگھڑ میں 9 بچوں کے 45سالہ باپ نے 11 بچوں کی 47سالہ ماں سے پسند کی شادی کرنے کے بعد حکومت سے تحفظ فراہم کرنے کی اپیل کردی ہے۔
نواب شاہ کے علاقے جھول کی رہائشی رانی بھیل اور چیتن نامی شخص نے شادی کرنے کے بعد جام صاحب پریس کلب میں اعلیٰ حکام سے تحفظ کا مطالبہ کیا۔ عمر رسیدہ پریمی جوڑا جو اب مجموعی طور پر 20 بچوں کا سائبان ہے، حکومتی اداروں سے تحفظ کے ساتھ ساتھ مدد کا بھی منتظر ہے۔
47 سالہ رانی بھیل کو 11 بچوں کے ہمراہ ان کے سابقہ شوہر نے گھر سے نکال دیا تھا جس کے بعد 45 سالہ چیتن نے خاتون اور ان کے بچوں کو اپنے گھر میں پناہ دی، بعد میں یہ تعلق محبت میں بدل گیا اور رانی بھیل اور چیتن نے عدالت میں شادی کرلی۔
جوڑے نے میڈیا سے بات چیت کرتے ہوئے بتایا کہ انہوں نے اپنے ہوش و حواس اور رضا مندی سے شادی کی ہے اب انہیں رانی کا سابقہ شوہر راموں بھیل اور ان کے رشتے دار جان سے مارنے کی دھمکیاں دے رہے ہیں۔
خاتون رانی نے بتایا کہ اس کا سابقہ شوہر راموں اسے تشدد کا نشانہ بناتا تھا اور گھر سے بھی نکال دیا تھا اب انہوں نے شادی کی ہے تو وہ ان کی جان کا دشمن بنا ہوا ہے۔ راموں اور اس کے رشتے داروں کے خوف سے وہ دربدر کی زندگی گزارنے پر مجبور ہیں۔
رانی اور چیتن نے حکومت سے دونوں کو تحفظ فراہم کرنے اور خاتون کے سابقہ شوہر راموں کیخلاف کارروائی کرنے کی بھی اپیل کی ہے۔