میک اپ خواتین کی ایک بڑی کمزوری سمجھا جاتا ہے بلکہ یوں کہنا زیادہ ٹھیک ہوگا کہ خواتین میک اپ کے بغیر خود کو ادھورا سمجھتی ہیں اور آج سیلفی کے دور میں تو خواتین کا میک اپ کے بغیر رہنا بہت ہی مشکل ہے لیکن آپ کو بتائیں کہ میک اپ کا یہ شوق کوئی نیا نہیں بلکہ ہزاروں سال پرانا ہے۔
ترکیہ میں آثارقدیمہ کے ماہرین نے 2 ہزار سال پرانی میک اپ کی دکان دریافت کی ہے، ماہرین کی جانب سے دریافت کیے گئے نوادرات میں پرفیوم کے برتن، میک اپ کے لیے استعمال ہونے والے آئی شیڈو اور بلش شامل ہیں۔
ماہرین آثار قدیمہ کو ہار اور بالوں کے لیے مختلف موتیوں کی مالا بھی ملی جبکہ ماہرین نے شہر میں ایک دکان کا بھی پتہ لگایا جس کے بارے میں اندازہ ظاہر کیا گیا ہے کہ یہاں زیورات اور کاسمیٹک مصنوعات فروخت کی جاتی تھیں۔
یہ کاسمیٹکس 2 ہزار سال پہلے رومی خواتین استعمال کرتی رہی تھیں اور یہ قابلِ ذکر دریافت قدیم شہر ایزونوئی میں کی گئی جو رومن دور میں ایک اہم سیاسی اور اقتصادی مرکز تھا اور اب یہ جدید دور کے مغربی ترکی کا حصہ ہے لیکن یہ شہر کبھی رومن دور میں سیاسی اور معاشی سرگرمیوں کے ایک اہم مرکز کے طور پر جانا جاتا تھا۔