پیٹ میں کیڑے ایک عام مرض ہے جو اکثر بچوں میں پائے جاتے ہیں لیکن بڑے بھی اس کا شکار ہوسکتے ہیں ،آلودہ پانی پینا، مٹی اور دیگر گندی چیزوں سے بھی پیٹ میں کیڑے پیدا ہوجاتے ہیں جنہیں اکثر ادویات کے ذریعے پیٹ سے نکال دیا جاتا ہے تاہم بھارت میں ایک بچے کے پیٹ سے دو درجن سے زیادہ کیڑے آپریشن کے ذریعے نکالے گئے۔
اکثر اس کی علامات اتنی عام ہوتی ہیں کہ لوگ توجہ بھی نہیں دیتے، یا انہیں پہچاننے سے قاصر رہتے ہیں، ہر وقت بھوک لگنا،جوڑوں کی اکڑن یا سوجن،یاداشت کے مسائل، سانس کے مسائل، خارش، خصوصاً منہ، ناک اور پیٹ کے اردگرد، مسوڑوں میں خون، جلدی امراض جیسے السر، زخم، چنبل ، سردرد،کھانے کی خواہش ختم ہوجانا، فوڈ الرجی، جنک اور میٹھے پکوانوں کی خواہش بڑھ جانا،ہر وقت نظام ہاضمہ کے مسائل، خون کی کمی بھی کیڑوں کی وجہ سے ہوتی ہے۔
بچہ گزشتہ چند دنوں سے پیٹ میں درد، الٹی اور پیٹ پھولنے کی تکلیف میں مبتلا تھا، ڈاکٹروں نے معائنہ کیا تو معلوم ہوا کہ بچے کی آنتوں میں رکاوٹ ہے، جس کا سبب کیڑے تھےجس کے بعد سرجن ڈاکٹر سندیپ مالیان نے بچے کے والدین کو آپریشن کا مشورہ دیا۔
آپریشن کی ویڈیو میں دیکھا جا سکتا ہے کہ سرجن آنت کاٹ کر اس میں سے فورسپس کے ذریعے ایک ایک کر کے بڑے کیڑے نکال رہے ہیں۔ سوشل میڈیا پر وائرل ویڈیو کو لاکھوں لوگ دیکھ چکے ہیں۔