فیفا فٹبال ورلڈ کپ 2026 کے کوالیفائرز ٹورنامنٹ میں ارجنٹینا نے برازیل کو صفر کے مقابلے میں ایک گول سے شکست دے دی ہے۔ارجنٹینا اور برازیل کے درمیان میچ تماشائیوں کی بدمزگی اور لڑائی کے باعث تاخیر سے شروع ہوا۔ویب سائٹ ’لائیو منٹ‘ کے مطابق جنوبی امریکہ کی دونوں بڑی ٹیموں کے درمیان ریو ڈی جنیرو کے تاریخی ماریکانا سٹیڈیم میں کھیلے گئے میچ سے پہلے حالات شدید خراب ہوئے جس کے باعث برازیل کی پولیس کو مداخلت کرنا پڑ گئی۔میچ سے قبل دونوں ٹیموں کے فینز کے درمیان کشیدگی رہی اور فینز آپس میں لڑتے نظر آئے۔پولیس نے میچ سے قبل بدمزگی پیدا کرنے والے ارجنٹینا کے فینز کو منتشر کرنے کے لیے لاٹھیوں کا استعمال کیا جبکہ اس دوران ارجنٹینا کے کھلاڑیوں کو صورتحال کو قابو کرنے کے لیے درمیان میں آنا پڑا۔اس صورتحال کے باعث سپرسٹار فٹبالر لائنل میسی اور ارجنٹینا کے باقی کھلاڑی گراؤنڈ سے باہر چلے گئے۔ Lionel Messi and the Argentina team walking towards the Argentina fans that are getting hit by security.pic.twitter.com/l6V7BAneyM
— Roy Nemer (@RoyNemer) November 22, 2023
لیونل میسی نے اس افراتفری میں کھیلنے سے ہچکچاہٹ کا اظہار کیا اور کہا کہ ’ہم نہیں کھیل رہے، ہم جا رہے ہیں‘ تاہم دونوں ٹیمیں تقریباً 30 منٹ کی تاخیر کے بعد دوبارہ سٹیڈیم میں واپس آگئیں لیکن میچ کے دوران سٹیڈیم کا ماحول کشیدہ رہا اور کئی تماشائیوں کو پولیس نے گرفتار بھی کیا۔اس میچ میں ارجنٹینا نے برازیل کو 63ویں منٹ میں نکولاس اوٹامینڈی کے گول کی بدولت شکست دے دی۔یہ ورلڈ کپ کوالیفائرز میں برازیل کی لگاتار تیسری شکست ہے جبکہ ہوم گراؤںڈ پر برازیل کو 1954 کے بعد پہلی مرتبہ ورلڈ کپ کوالیفائر کے میچ میں شکست کا سامنا کرنا پڑا ہے۔