اسلام آباد۔22دسمبر (اے پی پی):پاکستان کے لیونگ انڈس انیشی ایٹو کو ماحولیاتی نظام کی بحالی کے لئے اقوام متحدہ کی دہائی کے عالمی ماحولیاتی بحالی کے فلیگ شپ منصوبے کے طور پر منتخب کیا گیا ہے۔ اس بات کا اعلان اقوام متحدہ کے پروگرام برائے ماحولیات (یو این ای پی) کی ایگزیکٹو ڈائریکٹر انگر اینڈرسن نے پاکستان کے وزیر برائے موسمیاتی تبدیلی اور ماحولیاتی رابطہ کو ایک خط میں کیا۔
جمعہ کو وزارت موسمیاتی تبدیلی و ماحولیاتی رابطہ سے جاری ایک پریس ریلیز کے مطابق دی لیونگ انڈس انیشی ایٹو کو دنیا بھر کی 70 سے زیادہ حکومتوں کی حمایت حاصل ہے۔ یہ دریائے سندھ کے طاس میں لاکھوں ہیکٹر رقبے پر قدرتی ماحولیاتی نظام کی بحالی کا منصوبہ ہے جس نے پاکستان کی 90 فیصد آبادی اور معیشت کے لئے معاون ہونے کے ساتھ باوقار پہچان حاصل کی ہے۔وزارت موسمیاتی تبدیلی اور ماحولیاتی رابطہ کاری، صوبائی حکام اور یو این سسٹم کی طرف سے مشترکہ طور پر تیار کیا گیا، لیونگ انڈس انیشی ایٹو سندھ طاس کے ماحولیاتی حالات کو بہتر بنانے کے لئے ایک مشترکہ کوشش کی نمائندگی کرتا ہے۔ اس کا مجموعی نقطہ نظر موسمیاتی تبدیلیوں کی وجہ سے بیسن کو درپیش ماحولیاتی چیلنجوں سے نمٹنے پر مرکوز ہے جس میں فطرت پر مبنی حل اور ماحولیاتی نظام پر مبنی موافقت کی حکمت عملیوں پر زور دینے والے 25 اقدامات کا ایک مجموعہ ہے۔انگر اینڈرسن نے مسرت کا اظہار کرتے ہوئے منصوبے کی تعریف کی کہ یہ دنیا کی سب سے زیادہ امید افزا، پرجوش، اور بڑے پیمانے پر بحالی کی متاثر کن مثالوں میں سے ایک ہے۔ یہ پہچان منصوبے میں شامل اور اس کی حمایت کرنے والے ہر فرد کی انتھک کوششوں کی عکاسی کرتی ہے، ورلڈ ریسٹوریشن فلیگ شپس بشمول لیونگ انڈس انیشی ایٹو کا اعلان فروری 2024 میں اقوام متحدہ کی چھٹی ماحولیاتی اسمبلی کے دوران کیا جائے گا۔ یہ اعتراف پاکستان کے لئے ایک اہم سنگ میل ہے، جو عالمی سطح پر ماحولیاتی ذمہ داری اور پائیدار ترقی کے لئے اس کے عزم کو ظاہر کرتا ہے۔