کراچی۔ 25 دسمبر (اے پی پی):میئرکراچی بیرسٹرمرتضی وہاب نے کہا ہے کہ قائد اعظم عظیم رہنما تھے، ان کی قائدانہ صلاحیتوں اور جدوجہد کے باعث ہمیں پاکستان حاصل ہوا، زندہ قومیں اپنے محسنوں کو ہمیشہ یاد رکھتی ہیں اور ان کے کردار اور افکار کو سامنے رکھتے ہوئے کامیابی کی منازل طے کرتی ہیں، قائد اعظم محمد علی جناح ہمارے وہ عظیم رہنما ہیں جنہوں نے مسلمانوں کے لئے ایک علیحدہ ریاست کے خواب کو تعبیر دی اور آج ہم اپنے ملک میں پوری مذہبی آزادی کے ساتھ زندگی گزار رہے ہیں۔ ان خیالات کا اظہار انہوں نے پیر کو بابائے قوم قائد اعظم محمد علی جناح کے یوم ولادت کے موقع پر ان کے مزار پر حاضری اور شہریوں کی جانب سے چادر چڑھانے اور فاتحہ خوانی کے بعد گفتگو کرتے ہوئے کیا۔
میونسپل کمشنر سید افضل زیدی، ڈپٹی پارلیمانی لیڈر دل محمد، ڈائریکٹر جنرل پارکس جنید اللہ خان،سینئر ڈائریکٹر میڈیا مینجمنٹ علی حسن ساجد اورکے ایم سی کے محکمہ جاتی سربراہان بھی ان کے ہمراہ تھے۔ میئر کراچی نے کہا کہ قائد اعظم نے ایک منتشر قوم کو مجتمع کرکے عظیم مملکت پاکستان کے قیام کو یقینی بنایا اور دنیا کے نقشے پر ایک اسلامی اور نظریاتی مملکت کا قیام عمل میں آیا، قائد اعظم دنیا کے عظیم رہنما تھے اور ہم ان کے اقوال اور افکار پر عمل کرکے مضبوط قوم اور مستحکم معاشرہ تشکیل کرسکتے ہیں، قائد اعظم کام، کام اور صرف کام پر یقین رکھتے تھے، امید، ہمت اور خود اعتمادی قائد اعظم کا پیغام تھا، قائد اعظم نے فرمایا تھا کہ کوئی طاقت پاکستان کو ختم کرنہیں کرسکتی۔انہوں نے کہا کہ ہمیں قائد اعظم کے اصولوں کے مطابق اپنی زندگی کو بنانا چاہئے، یہ شہر، یہ صوبہ، یہ ملک ہمارا ہے ہمیں تعصب سے بالا تر ہو کر کام کرنا چاہئے، کراچی کی تعمیر و ترقی، امن، خوشحالی کے لئے ہم سب کو ایک ہونا ہوگا۔ میئر کراچی بیرسٹر مرتضی وہاب نے کہا کہ قائد اعظم کو پہلا شہری استقبالیہ دینے کا اعزاز کے ایم سی کو حاصل ہے، 25اگست 1947کو بلدیہ عظمی کراچی کی جانب سے اپنے اعزاز میں دیئے گئے شہری استقبالیہ سے خطاب کرتے ہوئے قائد اعظم نے کہا تھا کہ یہ شہر مجھے بہت عزیز ہے، میں اس شہر کو دنیا کا بہترین شہر بنتا دیکھ رہا ہوں، ہمیں اس شہر میں صنعتی، تجارتی اور معاشی سرگرمیوں کو فروغ دینا ہوگا۔انہوں نے کہا کہ شہر قائد کی خدمت میں کوئی کسر اٹھا نہیں رکھیں گے۔ میئر کراچی بیرسٹر مرتضی وہاب نے مہمانوں کی کتاب میں تاثرات درج کئے اور انہیں عظیم رہنما قرار دیا۔