آئی سی سی ٹی20 کرکٹ ورلڈ کپ 2024 کے حوالے سے ایک بڑی خبر سامنے آئی ہے جس میں ابتدائی شیڈول، پاکستان اور انڈیا کے درمیان میچ اور گروپس کی تفصیلات جاری کی گئی ہیں۔
کرکٹ کی کوریج کرنے والی ویب سائٹ ’کرک اِنفو‘ کے مطابق ویسٹ انڈیز اور امریکہ میں کھیلے جانے والے آئی سی سی ٹی20 ورلڈ کپ 2024 میں شریک 20 ٹیموں کو چار گروپس میں رکھا گیا ہے۔
گروپ اے میں پاکستان، انڈیا، آئرلینڈ، کینیڈا اور امریکہ شامل ہیں جبکہ گروپ بی میں دفاعی چیمپیئن انگلینڈ، آسٹریلیا، نمیبیا، سکاٹ لینڈ اور عمان شامل ہیں۔
اسی طرح گروپ سی میں نیوزی لینڈ، ویسٹ انڈیز، افغانستان، یوگنڈا اور پاپوا نیو گنی کو رکھا گیا ہے۔
ٹی20 ورلڈ کپ کے گروپ ڈی میں جنوبی افریقہ، سری لنکا، بنگلہ دیش، نیدرلینڈز اور نیپال کو شامل کیا گیا ہے۔
آئی سی سی ٹی20 ورلڈ کپ کا آغاز یکم جون سے ہوگا جس میں کینیڈا اور امریکہ کے درمیان میچ کھیلا جائے گا۔
Get ready for the ultimate cricket carnival in the West Indies and the USA
Unveiling the fixtures for the ICC Men’s T20 World Cup 2024 #T20WorldCup | Details
— ICC (@ICC) January 5, 2024
ٹی20 ورلڈ کپ کا گروپ مرحلہ یکم جون سے 18 جون جبکہ سپر ایٹ مرحلہ 19 سے 24 جون کے درمیان ہوگا۔
ٹی20 ورلڈ کپ کا پہلا سیمی فائنل 26 جون کو گیانا اور دوسرا سیمی فائنل 27 جون کو ٹرینیڈیڈ میں کھیلا جائے گا جبکہ ٹی20 ورلڈ کپ کا فائنل 29 جون کو بارباڈوس میں ہوگا۔
اس ورلڈ کپ کا سب سے ہائی وولٹیج مقابلہ یعنی پاکستان اور انڈیا کے درمیان میچ 9 جون کو نیو یارک کے ایسن ہوور پارک سٹیڈیم میں کھیلا جائے گا۔
اس ٹورنامنٹ کے مجموعی 55 میچوں کی میزبانی ویسٹ انڈیز کے چھ جزائر بارباڈوس، ٹرینیڈیڈ، گیانا، انٹیگا، سینٹ لوشیا اور سینٹ ونسنٹ جبکہ امریکہ کے تین شہر نیو یارک، فلوریڈا اور ٹیکسس کریں گے۔
والے آئی سی سی ٹی20 ورلڈ کپ 2024 میں شریک 20 ٹیموں کو چار گروپس میں رکھا گیا ہے (فوٹو: کرک اِنفو)
ٹورنامنٹ میں پاکستانی ٹیم اپنا پہلا میچ 6 جون کو ڈیلاس میں امریکہ کے خلاف کھیلے گی جبکہ پاکستان اور انڈیا کا میچ 9 جون کو نیو یارک میں ہوگا۔
پاکستانی ٹیم گروپ مرحلے میں اپنا تیسرا میچ 11 جون کو نیو یارک میں کینیڈا اور چوتھا میچ لاؤڈرہِل (فلوریڈا) میں 16 جون کو آئرلینڈ کے خلاف کھیلی گی۔
خیال رہے آئی سی سی ٹی20 ورلڈ کپ 2024 میں انگلینڈ اپنے ٹائٹل کا دفاع کرے گا۔