انڈیا کی کرکٹ ٹیم کے کپتان روہت شرما نے افغانستان کے خلاف میچ میں اپنے ٹی20 کیریئر کی پانچویں سینچری سکور کر کے تاریخ رقم کی ہے۔
بدھ کو بینگلورو میں انڈیا اور افغانستان کے درمیان میچ میں روہت شرما نے تیز ترین سینچری بنا ڈالی اور ٹی 20 میں پانچ سینچریاں مکمل کرنے والے پہلے بیٹر بن گئے ہیں۔تیسرے ٹی20 میں انڈیا نے پہلے کھیلتے ہوئے مقررہ 20 اوورز میں چار کھلاڑیوں کے نقصان پر افغانستان کو 212 رنز کا ہدف دیا۔ افغانستان کے ساتھ میچ میں روہت شرما 69 گیندوں پر 121 رنز بنا کر ناٹ آؤٹ رہے۔ انہوں نے آٹھ چھکوں اور 11 چوکوں کی مدد سے شاندار اننگز کھیلی۔اس اننگز کے ساتھ روہت شرما نے بطور کپتان اپنے مجموعی رنز میں وراٹ کوہلی کو بھی پیچھے چھوڑ دیا ہے۔ وراٹ کوہلی ٹی20 کرکٹ میں سب سے زیادہ 1570 رنز بنانے والے کپتان تھے۔اس سے قبل روہت شرما نے 2018 میں لکھنؤ میں ویسٹ انڈیز کے خلاف ایک میچ میں 111 رنز بنائے تھے۔افغانستان کے خلاف روہت شرما کے 121 رنز ٹی20 میں ان کے کیریئر کا سب سے بڑا انفرادی سکور ہے۔ اس سے قبل انہوں نے 2017 میں اندور میں سری لنکا کے خلاف میچ میں 118 رنز بنائے تھے۔