پیرس اولمپکس کوالیفائر ایونٹ میں نیوزی لینڈ نے تیسری پوزیشن کے لیے میچ میں پاکستان کو دو کے مقابلے میں تین گول سے شکست دے کر پیرس اولمپکس کے لیے کوالیفائی کرنے کی دوڑ سے باہر کر دیا۔عمان کے شہر مسقط میں کھیلے گئے اولمپکس کوالیفائر ایونٹ میں نیوز لینڈ نے پاکستان کو شکست دے کر تیسری پوزیشن حاصل کر لی۔اس فتح کے ساتھ نیوزی لینڈ پیرس اولمپکس کے لیے کوالیفائی کرنے والی تیسری ٹیم بن گئی۔
تین کوارٹر تک پاکستان کو نیوزی لینڈ کے خلاف ایک کے مقابلے میں دو گول کی برتری حاصل تھی۔
لیکن چوتھے اور آخری کوارٹر میں نیوزی لینڈ نے شاندار کھیل پیش کیا اور نہ صرف سکور برابر کیا بلکہ ایک گول کی برتری بھی حاصل کی جو میچ کے آخر تک برقرار رہی۔ پاکستان کی جانب سے ابوبکر محمود نے دونوں گول سکور کیے۔ پاکستان نے پہلا گول پینلٹی کارنر اور دوسرا پینلٹی سٹروک کے ذریعہ سکور کیا۔نیوزی لینڈ نے پینلٹی کارنر کے ذریعہ پہلا گول سکور کیا جب کہ دو فیلڈ گول کیے۔نیوزی لینڈ کو شکست دینے کی صورت میں پاکستان ہاکی ٹیم اولمپکس کیلئے کوالیفائی کر سکتی تھی۔ جرمنی اور انگلینڈ کی ٹیموں کے درمیان فائنل آج ہوگا۔ پہلے سیمی فائنل میں جرمنی نے پاکستان کو چار گول سے شکست دی تھی جبکہ انگلینڈ نے نیوزی لینڈ کو ایک کے مقابلے میں تین گول سے ہرا دیا تھا۔ٹورنامنٹ کی ٹاپ تھری ٹیمیں پیرس اولمپکس کیلئے کوالیفائی کر لیا ہے۔