اسلام آباد۔22مئی (اے پی پی):وفاقی وزیر فوڈ سیکورٹی اینڈ صنعت و پیداوار رانا تنویر نے کہا ہے کہ وزیر اعظم کی ہدایت پر زرعی شعبے کی ترقی کا پختہ عزم کر رکھا ہے ، زرعی ترقی سے کسان اور ملک کی ترقی وابستہ ہے، کسانوں کا کسی صورت استحصال قبول نہیں ۔ ان خیالات کا اظہار انہوں نے بدھ کو صوبائی وزیر زراعت پنجاب سید عاشق حسین کرمانی سے ملاقات کے دوران کیا۔ اس موقع پر وفاقی سیکرٹری انڈسٹری وسیم اجمل چوہدری بھی موجود تھے ۔
دونوں وزراء نے زراعت کی ترقی اور باہمی دلچسپی کے امور پر تبادلہ خیال کیا۔ وفاقی وزیر رانا تنویر نے کہا کہ وزیر اعظم کی ہدایت پر زرعی شعبے کی ترقی کا پختہ عزم کر رکھا ہے ، کسانوں کو یوریا اور ڈے اے پی کھاد کی بلا تعطل فراہمی کو یقینی بنانے کیلئے مربوط حکمت عملی تشکیل دی ہے ، کسانوں کو کھاد کی بلا تعطل فراہمی کو یقینی بنانے کیلئے ایک ایپ تشکیل دینے کا فیصلہ کیا ہے جس کا مقصد فرٹیلائزر کمپنی سے لے کر ڈیلر تک کھاد کی نگرانی کی جائے گی ۔ انہوں نے کہا کہ ڈیلر کو پابند کیا جائے گا کہ کسانوں کو کھادوں کی ترسیل میں شفافیت کو یقینی بنائے، وفاق اور صوبائی حکومتیں اس عمل کی بھر پور نگرانی کریں گی ، جو عناصر منافع خوری اوور پراسیسنگ میں ملوث ہوں گےان کےخلاف سخت قانونی کارروائی کی جائے گی ۔ رانا تنویر نے کہا کہ وفاقی حکومت ایجنسیوں کے ذریعے بھی مانیٹرنگ رپورٹ لے گی ، انڈسٹری کو گیس کی سپلائی کی بلاتعطل فراہمی کیلئے تمام تر ضروری اقدامات کو یقینی بنا رہے ہیں ، کھاد کی فراہمی یقینی بنانے کیلئے کھاد امپورٹ بھی کر رہے ہیں ۔ انہوں نے کہا کہ پاکستان زرعی ملک ہے ،زراعت کی ترقی ہمارا ایجنڈا اور مشن ہے، زرعی ترقی سے کسان اور ملک کی ترقی وابستہ ہے، کسانوں کا کسی صورت استحصال قبول نہیں ۔