گزشتہ ہفتے کراچی میں گرمی کی شدت میں اضافے کے پیشِ نظر بورڈ کے امتحانات تک
ملتوی کردیے گئے تھے لیکن اب رواں ہفتے کے حوالے سے بھی یہ پیش گوئی سامنے آئی ہے
کہ گرمی کی شدت میں مزید اضافہ ہوسکتا ہے-
چیف میٹرولوجسٹ سردار سرفراز کے مطابق کراچی میں 29 سے 31 مئی تک پارہ 40 ڈگری سے
تجاوز کر سکتا ہے۔
سردار سرفراز کا کہنا تھا کہ درجہ حرارت 40 سے 42 ڈگری سینٹی گریڈ تک جانے کا امکان
ہے، جبکہ دوسری جانب اس دوران دن کے بیشتر حصے میں شمال مغرب کی جانب سے گرم اور
خشک ہوائیں چل بھی سکتی ہیں۔
البتہ چیف میٹرولوجسٹ سردار سرفراز کا یہ بھی کہنا ہے کہ شہرِ قائد میں شام میں
سمندری ہوائیں بحال ہونے کا امکان ہے۔
ان کا کہنا ہے کہ جون کے پہلے ہفتے میں درجۂ حرارت میں کمی آ سکتی ہے، جون میں
درجۂ حرارت 35 سے 37 ڈگری سینٹی گریڈ تک متوقع ہے۔
چیف میٹرولوجسٹ سردار سرفراز کا یہ بھی کہنا ہے کہ جون میں کراچی کا موسم گرم اور
مرطوب رہنے کا امکان ہے-
کراچی کے علاوہ پنجاب آج بھی ہیٹ ویو اور گرمی کی لہر برقرار رہنے کا امکان ہے۔
پراونشل ڈیزاسٹر مینجمنٹ اتھارٹی (پی ڈی ایم اے ) پنجاب کے ترجمان کا کہنا ہے کہ آج
درجہ حرارت 45 سے 50 ڈگری تک جا سکتا ہے۔