مکہ مکرمہ ۔30مئی (اے پی پی):سعودی عرب میں پاکستانی عازمینِ حج کی آمد کا سلسلہ جاری ، 170 پروازوں کے ذریعے 41 ہزار 477سرکاری عازمینِ سعودی عرب پہنچ گئے ہیں ، آئندہ دس دنوں میں مزید 28 ہزار 628 سرکاری عازمینِ حج مکہ مکرمہ پہنچیں گے۔ ترجمان مذہبی امور کے مطابق امسال پاکستانی حج مشن 70 ہزار 105 سرکاری عازمین حج اور 80 ہزار سے زائد پرائیویٹ عازمین کی میزبانی کرے گا ، نجی حج سکیم کے ذریعے ساڑھے 10 ہزار سے زائد عازمینِ حج سعودی عرب پہنچ چکے ہیں ،
یکم جون تک براہ راست مدینہ منورہ آنے والے تمام عازمینِ مکہ مکرمہ پہنچ جائیں گے ۔انہوں نے کہا کہ سعودی حکام کے خصوصی تعاون سے مدینہ منورہ میں 30 ہزار 9 سو عازمینِ حج کو زیارتِ ریاض الجنہ کروا دی گئی ہے، موبائل ایپ پاک حج ، دو ٹال فری ہیلپ لائنز اور 4 واٹس ایپ نمبرز کے ذریعے عازمینِ حج کی شکایات کا ازالہ کیا جا رہا ہے۔ان کا کہنا تھا کہ حرمین میں 2 مرکزی ہسپتال اور درجن بھر ڈسپنسریوں کے ذریعے 282 ڈاکٹرز اور طبی عملہ طبی سہولیات فراہم کر رہا ہے،پاکستان حج مشن کے مرکزی ہسپتالوں میں جدید ایمبولینس، لیبارٹری، ایکسرے ، الٹراسائونڈ، ای سی جی، مائنر او ٹی، زنانہ و مردانہ وارڈ ز اور شعبہ دندان موجود ہیں ۔ ترجمان نے کہا کہ عازمینِ حج کی سفری اور رہائشی سہولیات نیز خوراک کی فراہمی کےلئے پاکستانی سول اور یونیفارم افسران و عملے پر مشتمل 390 معاونین کام کر رہے ہیں۔مذہبی امور کے 131 افسران و معاون عملہ مین کنٹرول آفس، مدینہ اور جدہ ایئرپورٹس ، شعبہ گمشدگی و بازیابی، مدینہ ڈیپارچر سیل، مانیٹرنگ سیل، اکائونٹس و انتظامیہ کے معاملات دیکھ رہے ہیں۔مکہ مکرمہ و مدینہ منورہ میں گزشتہ 20 دنوں میں 115 عازمین کرام کو تلاش کر کے ان کی رہائش گاہوں تک پہنچایا گیا، 683 بیگز ، پرس اور 160 وہیل چیئرز تلاش کر کے مالکان تک پہنچائی گئیں۔ان کا کہنا تھا کہ گزشتہ 20 دنوں میں خوراک کی 454، رہائش کی 1123 جبکہ ٹرانسپورٹ کی 264 شکایات کا ازالہ کیا گیا ،حرم مکی میں داخلی راستوں پر تعینات حرم گائیڈز نے اب تک 17 ہزار 924 عازمینِ حج کو رہنمائی فراہم کی ہے۔