اسلام آباد۔13جون (اے پی پی):چیئرمین وزیراعظم یوتھ پروگرام رانامشہود احمد خان نے کہا ہے کہ حکومت کی دانشمندانہ پالیسیوں کے باعث مہنگائی،درآمدات اورشرح سود میں کمی آئی ہے،ملکی معیشت کو دوبارہ مثبت سمت میں رواں کرنے کا کریڈٹ وزیراعظم محمد شہباز شریف کی قیادت کو جاتا ہے۔جمعرات کو اپنے بیان میں انہوں نے کہا کہ ہم نے آئی ایم ایف کے سٹینڈ بائی ایگر یمنٹ مکمل کیا جو بڑی کامیابی ہے ،اس کے نتیجے میں معاشی استحکام دیکھنے میں آیا۔
انہوں نے کہا کہ ہم نے مہنگائی کا بوجھ کم کیا ہے، 38 فیصد سے مہنگائی کم ہو کر 11فیصد پر آگئی ہے،سٹیٹ بینک کی شر ح سود میں کمی اس بات کا ثبوت ہے،ہم نے برآمدات بڑھائی ہیں اور درآمدات کم کی ہیں ، اس سے روپے میں توازن اور ٹھہرائو پیدا ہو ا ہے۔انہوں نے کہا کہ وزیراعظم میاں محمد شہباز شریف جب اقتدار میں آئے تھے ملک ڈیفالٹ کے دہانے پر تھا، ملکی معیشت کو دوبارہ مثبت سمت میں رواں کرنے کا کریڈٹ وزیراعظم محمد شہباز شریف کی قیادت کو جاتا ہے۔ رانا مشہود احمد نے کہا کہ مجموعی طور پر معیشت میں گروتھ اضافہ کے لئے کوشاں ہیں۔