برائٹن: انگلینڈ کے فاسٹ باؤلر اولی رابنسن نے ایک اوور میں 43 رنز دے کر بدترین ریکارڈ اپنے نام کر لیا۔
سسیکس اور لیسٹر شائر کے درمیان انگلش کاؤنٹی چیمپئن شپ کے میچ میں انگلش فاسٹ باؤلر اولی رابنسن فرسٹ کلاس کرکٹ میں ایک ہی اوور میں سب سے زیادہ رنز دینے والے دوسرے باؤلر بن گئے۔
سسیکس کی نمائندگی کرنے والے فاسٹ باؤلر اولی رابنسن نے ایک اوور میں 43 رنز دیئے۔ جس میں 3 چوکے، 5 چھکے اور ایک سنگل رن شامل تھا۔ یہ کاؤنٹی چیمپئن شپ کی تاریخ کا سب سے مہنگا ترین اوور تھا۔
اولی رابنسن نے اپنے اوور میں 3 نو بالز کیں جن میں سے ہر ایک بال پر لوئس کمبر نے چھکا لگایا۔
لوئس کمبر نے دوسری اننگز میں جارحانہ بیٹنگ کرتے ہوئے تنہا 243 رنز بنائے جس میں 21 چھکے اور 20 چوکے شامل تھے تاہم اسکے باوجود وہ لیسٹر شائر کو میچ نہ جتوا سکے اور سسیکس نے 18 رنز سے یہ میچ جیت لیا۔
یہ بھی پڑھیں: ٹی ٹوئنٹی ورلڈ کپ کیلئے آئی سی سی کا انوکھا قانون
واضح رہے کہ ایک اوور میں سب سے زیادہ رنز دینے کا ریکارڈ رابرٹ وینس کے پاس ہے جنہوں نے 90-1989 میں ویلنگٹن اور کینٹربری کے درمیان کھیلے گئے میچ میں ایک اوور میں 77 رنز دیئے تھے۔
الیکس ٹوڈور نے 1998 میں سورے اور لنکاشائر کے میچ میں ایک اوور میں 38 رنز دییے تھے۔ حال ہی میں ورسیٹ شائر اور سورے کے درمیان میچ میں شعیب بشیر نے ایک اوور میں 38 رنز کھائے تھے۔