ایران میں قاتلانہ حملے میں شہید حماس کے سربراہ اسماعیل ہنیہ کی نماز جنازہ آج تہران میں ادا کردی گئی۔ ایرانی سپریم لیڈرآیت اللہ خامنہ ای نے اسماعیل ہنیہ کی نماز جنازہ پڑھائی۔ تدفین جمعہ کو دوحا میں ہوگی ۔
ایرانی میڈیا کے مطابق اسماعیل ہنیہ کی نمازجنازہ میں اہم ایرانی سرکاری عہدیداران شریک تھے، اسماعیل ہنیہ کا جسد خاکی آج قطر کے دارالحکومت دوحا پہنچایا جائے گا، اسماعیل ہنیہ کی تدفین دوحا میں ہوگی۔
واضح رہے کہ گزشتہ روز فلسطین کی مزاحمتی تنظیم حماس کے سیاسی سربراہ اسماعیل ہنیہ ایران کے دارالحکومت تہران میں اسرائیلی حملے میں شہید ہوگئے تھے۔ اسماعیل ہنیہ کی شہادت پر مسلمہ اُمہ میں غم وغصے کی لہر، فلسطین، لبنان سمیت کئی ملکوں میں احتجاجی مظاہرے ہوئے۔
حماس سربراہ کی شہادت نے فلسطینی عوام میں نئی روح پھونک دی اُن کے حوصلے مزید بلند ہوگئے۔ بیٹے عبدالسلام ہنیہ نے فلسطین کی آزادی کیلئے جدوجہد جاری رکھنے کا اعلان کر دیا ۔ کہا میرے والد نے ہمیشہ شہادت کی خواہش کی تھی ۔ ان کی خواہش کو اللہ نے پورا کیا، قیادت کے قتل سے اسرائیل کے خلاف مزاحمت ختم نہیں ہوگی۔
اسماعیل ہنیہ کی بہو اناس ہنیہ نے کہا کہ اللہ کے فیصلے پر دل مطمئن ہے ۔ یہ دنیا فانی ہے ۔ اللہ کی رضا پر راضی ہوں ۔ ہماری آنکھیں اشکبار اور دل آپکی جدائی میں غمگین ہے ۔ امید ہے آپ سے جنت میں ملاقات ہوگی۔