جارجیا کے ریزورٹ میں روسی سیاح پر آسمانی بجلی گرنے کا حیران کن واقعہ؛ ویڈیو نے دل دہلا دیے!
جارجیا کے ایک مشہور ریزورٹ میں ایک خوفناک لیکن معجزاتی واقعہ پیش آیا جہاں ایک روسی سیاح پاول سمرنوف پر آسمانی بجلی گری، لیکن وہ زندہ بچ گیا۔ یہ دل دہلا دینے والا منظر سی سی ٹی وی کیمرے میں قید ہوگیا اور اب سوشل میڈیا پر وائرل ہے، جس نے دیکھنے والوں کو حیرت میں ڈال دیا ہے۔
غیرملکی خبررساں اداروں کے مطابق، یہ واقعہ اس وقت پیش آیا جب پاول سمرنوف اپنے بھائی اور ایک دوست کے ساتھ ریزورٹ میں رقص کر رہا تھا۔ ویڈیو میں دیکھا جاسکتا ہے کہ اچانک بجلی اس کے سر کے پچھلے حصے پر گری، جس سے وہ زمین پر گر گیا۔ حیرت انگیز طور پر، اس کے ساتھ موجود بھائی اور دوست کو کوئی نقصان نہیں پہنچا اور انہیں فوراً پاول کی مدد کے لیے بھاگتے ہوئے دیکھا گیا۔
پاول کے بھائی نے فوری طور پر اپنی جلتی ہوئی ٹی شرٹ سے آگ بجھائی، جبکہ دوستوں نے فوراً ایمبولینس کو بلایا۔ پاول سمرنوف نے بعد میں بیان دیا کہ جب بجلی گری تو اسے لگا کہ اس کا جسم جل رہا ہے اور وہ مرنے والا ہے۔ اس نے کہا: "پہلی چیز جو میں نے دیکھی وہ روشنی تھی، اور پھر مجھے لگا کہ میرے بازو اور ٹانگیں مفلوج ہوگئے ہیں۔"
خوش قسمتی سے، پاول سمرنوف کو فوری طور پر اسپتال منتقل کیا گیا، جہاں وہ زیر علاج ہے۔ ڈاکٹروں کے مطابق، وہ جلد ہی صحت یاب ہو جائے گا اور امید ہے کہ چند دنوں میں اسپتال سے ڈسچارج کر دیا جائے گا۔
یہ واقعہ سوشل میڈیا پر بڑی تیزی سے وائرل ہو رہا ہے اور لوگوں کو یاد دلا رہا ہے کہ قدرت کے معجزات اور غیر متوقع واقعات کیسے زندگی کے ہر لمحے کو بدل سکتے ہیں۔