امریکی ریاست مسوری میں 35 سال پرانے قتل کیس کو جڑواں بہنوں نے اپنے پوڈکاسٹ کی مدد سے ایک نیا موڑ دے دیا، جس کی بدولت ایک مشتبہ قاتل کو گرفتار کر لیا گیا۔
13 اکتوبر 1989 کی رات، جمی ویڈ مارٹن کا خون میں لت پت جسم بونی ٹیر کی ایک گلی میں پایا گیا۔ بار میں جھگڑے کے دوران مارٹن کو سر پر شدید ضربیں لگی تھیں، جس سے وہ جانبر نہ ہو سکا۔ اس وقت مارٹن کی 11 سالہ جڑواں بیٹیاں، اینجلا ولیمز اور آندریا لن، اس اندوہناک خبر سے اس وقت آگاہ ہوئیں جب وہ ایک فیملی دوست کے ساتھ کیمپنگ کر رہی تھیں۔
پولیس نے ابتدائی تفتیش میں ایک مشتبہ شخص کو گرفتار کیا تھا لیکن کچھ ہی دن بعد اسے رہا کر دیا گیا اور کیس ایک بند گلی میں پہنچ گیا۔
مارٹن کی بیٹیوں نے اپنے والد کے قتل کی حقیقت جاننے کی جدوجہد برسوں تک جاری رکھی۔ 2007 میں جب اینجلا اور آندریا 29 سال کی ہوئیں، تو انہوں نے اس کیس کو سنجیدگی سے دوبارہ کھنگالنے کا فیصلہ کیا۔ انہوں نے خود تحقیقات شروع کیں، کیس سے متعلق دستاویزات اکٹھی کیں اور مقامی افراد سے تعاون کی اپیل کی۔
2020 میں، انہوں نے "Small Town Forgotten" نامی پوڈکاسٹ کا آغاز کیا، جس نے اس معاملے کو ایک بار پھر عوامی توجہ کا مرکز بنا دیا۔ اس پوڈکاسٹ نے لوگوں کے ذہنوں میں پرانی یادیں تازہ کر دیں اور اس کی بدولت 2021 میں 69 سالہ ویسلی پال مارلر کو گرفتار کر لیا گیا۔ ویسلی پر حملے کا الزام ہے، مگر اس نے جرم قبول کرنے سے انکار کیا ہے۔
اب ان جڑواں بہنوں کو امید ہے کہ ان کے والد کے قاتل کو آخر کار انصاف کے کٹہرے میں لایا جائے گا اور ان کے والد کی موت کا معمہ حل ہو جائے گا۔