بالی ووڈ کے سینئر اداکار اور معروف کامیڈین راجپال یادیو کو حالیہ دنوں ایک صحافی کے سوال پر شدید غصہ آیا جس کے بعد ان کے ردعمل نے خاصی توجہ حاصل کرلی۔ بھارتی میڈیا کے مطابق صحافی نے ان سے دیوالی پر پٹاخے نہ جلانے کی اپیل کے متعلق وضاحت طلب کی تو راجپال یادیو بھڑک اٹھے اور غصے میں صحافی کا موبائل فون چھیننے کی کوشش کی۔ ویڈیو ریکارڈنگ جاری رہنے کی وجہ سے یہ ویڈیو سوشل میڈیا پر وائرل ہوگئی۔
چند روز قبل راجپال یادیو نے ایک ویڈیو پیغام میں اپنے پرستاروں سے گزارش کی تھی کہ دیوالی کے موقع پر پٹاخے نہ پھوڑیں کیونکہ اس سے فضائی اور صوتی آلودگی میں اضافہ ہوتا ہے۔ تاہم ان کے اس بیان پر مذہبی اور انتہا پسند حلقوں کی جانب سے تنقید کا سامنا کرنا پڑا، جس کے بعد انہوں نے اپنی وہ ویڈیو ڈیلیٹ کرکے ایک نئی ویڈیو میں معذرت پیش کی۔
نئی ویڈیو میں راجپال نے اپنے دوستوں کو دیوالی کی مبارکباد دیتے ہوئے کہا کہ "میں نے دیوالی سے متعلق اپنی ویڈیو ڈیلیٹ کردی ہے۔ اگر میری بات سے کسی کو تکلیف پہنچی ہو تو میں معذرت چاہتا ہوں۔ میری خواہش ہے کہ آپ سب دیوالی کو بھرپور جوش اور صحت کے ساتھ منائیں۔"
53 سالہ اداکار راجپال یادیو حال ہی میں فلم "بھول بھلیاں 3" میں چھوٹا پنڈت کے منفرد کردار میں نظر آئے ہیں، جس میں ان کی کارکردگی کو شائقین نے خوب سراہا۔