پاکستانی معروف اداکارہ و ماڈل مریم نفیس اور ان کے شوہر امان احمد جلد والدین بننے والے ہیں۔
اداکارہ نے بذریعہ سوشل میڈیا اپنے چاہنے والوں کو خوش خبری سنا دی۔ فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے مختلف تصاویر اور مختصر دورانیے کی ویڈیو شیئر کر کے اپنے یہاں ننھے مہمان کی آمد سے متعلق مداحوں کو آگاہ کیا ہے۔
اداکارہ نے انسٹا پوسٹ میں چند تصاویر شیئر کی ہیں جن میں انہیں اپنے شوہر اور فلم ساز امان احمد کے ساتھ ننھے مہمان کے پیلے جوتے اور الٹرا ساؤنڈ رپورٹ کے ہمراہ خوش گوار موڈ میں دیکھا جا سکتا ہے۔
انہوں نے انسٹا پوسٹ کے کیپشن میں دعاؤں کی درخواست کرتے ہوئے لکھا ہے کہ ہم بہت جلد والدین بننے والے ہیں، ہمیں دعاؤں میں یاد رکھیں۔
اداکارہ کی جانب سے یہ خوش خبری شیئر کیے جانے کے بعد شوبز انڈسٹری سے تعلق رکھنے والے دوستوں اور مداحوں کی جانب سے اس جوڑے کو مبارک باد دی جا رہی ہے۔
واضح رہے کہ اداکارہ مریم نفیس نے فلم ساز امان احمد سے اکتوبر 2022ء میں شادی کی تھی، ان کے یہاں پہلے بچے کی آمد جلد متوقع ہے۔