بالی وڈ کی مشہور ترین فلم’بارہویں فیل‘ میں مرکزی کردار نبھانے والے اداکار وکرانت میسی نے اداکاری سے ریٹائرمنٹ کا اعلان کردیا۔
37 سالہ اداکار نے انسٹا پر پوسٹ شیئر کرتے ہوئے اچانک اپنی ریٹائرمنٹ کا اعلان کرکے سب کو حیران کردیا۔
انہوں نے انسٹاگرام پر ایک نوٹ شیئر کرتے ہوئے لکھا کہ 2025 میں آخری بار اپنے مداحوں سے ملوں گا، پچھلے کچھ سال یقینی طور پر غیر معمولی رہے، میں مداحوں کے بے پناہ پیار اور سپورٹ پر آپ سب کا شکر گزار ہوں۔
وکرانت میسی نے لکھا کہ میں جیسے جیسے اپنی زندگی میں آگے بڑھ رہا ہوں مجھے احساس ہو رہا ہے کہ اب وقت آ چکا ہے کہ بطور شوہر، والد اور بیٹا مجھے اپنی کچھ ذمہ داریاں نبھانی ہیں جو میں پہلے نہیں نبھا سکا۔
اداکار نے اپنے مداحوں کا شکریہ ادا کرتے ہوئے مزید لکھا کہ لہٰذا آنے والے سال 2025 میں ہم ایک دوسرے سے آخری بار ملیں گے، اس وقت تک کے لیے جب تک مناسب وقت نہیں آ جاتا۔
انہوں نے یہ بھی لکھا کہ آخری 2 فلمیں اور کئی برسوں کی یادوں کے لیے ایک بار پھر شکریہ، ہمیشہ کے لیے آپ کا مقروض رہوں گا۔
بھارتی میڈیا رپورٹس کے مطابق وکرانت میسی ان دنوں اپنی 2 فلموں یار جگری اور آنکھ کی گستاخیاں کی شوٹنگ میں مصروف ہیں جو اگلے برس ریلیز کی جائیں گی۔
اداکار کے ریٹائرمنٹ کے اعلان کے بعد مداح افسردہ ہیں۔