بھارتی اداکار چنکی پانڈے نے حال ہی میں کپل شرما کے شو میں شرکت کی، جہاں انہوں نے اپنے ساتھ پیش آنے والا ایک دلچسپ واقعہ سنا دیا۔
چنکی پانڈے نے بتایا کہ انہوں نے ماضی میں ایک تاجر کی آخری رسومات میں شرکت کی تھی جہاں انہیں رونے کیلیے پیسوں کی پیشکش کی گئی تھی۔
اداکار نے دوران گفتگو اس بات کا اعتراف بھی کیا کہ وہ ماضی میں پیسوں کیلیے زیادہ سے زیادہ تقاریب میں شرکت کرتے تھے۔
بھارتی میڈیا کے مطابق، چنکی پانڈے نے شو میں قصہ سنایا کہ، ایک بار انہیں ایک آرگنائزرکا فون آیا جس نے ان سے پوچھا کہ وہ کیا کر رہے ہیں؟ انہوں نے بتایا کہ وہ شوٹنگ کیلیئے گھر سے نکل رہے ہیں، پھر اس نے پوچھا کہ شوٹنگ کہاں ہے تو چنکی نے بتایا کہ فلم سٹی میں ہے۔
اداکار نے مزید بتایا کہ، آرگنائزر نے مجھ سے کہا کہ آپ کے راستے میں ایک چھوٹا سا پروگرام ہے اور 10 منٹ کیلیئے شرکت کرنی ہے جس کے اچھے پیسے مل جائیں گے۔
پیسوں کا سن کر میں نے کہا کہ ٹھیک ہے میں آتا ہوں۔ اس کے بعد اس نے مجھے سفید کپڑے پہن کر آنے کو کہا۔ میں نے زیادہ دھیان نہیں دیا اور سفید کپڑے پہن کر چلا گیا۔
جب میں وہاں پہنچا تو دیکھا باہر سب سفید کپڑے پہنے کھڑے ہیں اور مجھے دیکھ کر میرا نام پکارنے لگے، میں اندر چلا گیا جب دیکھا تو وہاں میت رکھی تھی۔ مجھے لگا کہ آرگنائزر کا اچانک انتقال ہوگیا ہے جس نے مجھے بلایا تھا۔
مگر دلچسپ بات تو یہ تھی کہ نظر گھمانے پر میں نے دیکھا کہ وہ تو سامنے کھڑا ہے، میں نے اسے بلایا، پاس آنے پر وہ مجھے کہنے لگا کہ اگر آپ اس شخص کی میت پر روئیں گے تو آپ کو اور اچھی اور بھاری رقم ملے گی۔
کپل کے شو میں یہ قصہ سن کر سب زور زور سے ہنسنے لگے۔